Dünənki böyük tıxacın səbəbkarı Hacıbala Abutalıbovun "xaos planı"
Paytaxtda həyat iflic olub. Sözün əsl mənasında şəhərin arteriyası sayılan yolların demək olar ki, hamısı səhər-axşam boşalmaq bilməyən nəqliyyat vasitələrinin yaratdığı tıxaca təslim olub. Tıxaclarda xərclənən əsəb, izafi yandırılan yanacaq, paytaxt sakinlərinin çəkdiyi mənəvi, psixi əziyyət və onlara dəyən maddi ziyan...
Bütün bunları üst-üstə gəlsək hazırda paytaxtımızın küçələrində baş verənlər sözün əsl mənasında cəmiyyətimizə və dövlətimizə qarşı yönəldilmiş bir təxribat, terror və mədəni müharibədir. Birdən-birə paytaxtın 5 mərkəzi küçəsini, həm də həftə arası, iş günləri bağlamaqla Bakını partlayış həddinə gətirmək, respublika əhalisinin, həm də əmək, iş qabiliyyəti olan əhalinin böyük bir hissənin yaşadığı bu şəhərdə yalnız və yalnız böyük "xaos planı"nı həyata keçirməkdir.
Mümkün əhali-yol polis qarşıdurması
Tıxaclarda sürücülər və yol nəqliyyatını tənzimləməyə çalışan polislər arasında yaranan, qarşıdurmaya qədər gətirib çıxaran narazılıqlar artıq bir-neçə nəfərin deyil, bütövlükdə cəmiyyətin problemidir. Qeyri-rəsmi hesablamalara görə, 9 milyon yarımlıq Azərbaycan əhalisinin 4 milyona yaxını Bakı və Abşeron yarımadasında məskunlaşıb. Təkrar edirik, əhalinin əsas iş və əmək qabiliyyətli, intellektual hissəsinin toplaşdığı böyük meqapolisdə baş verə biləcək hər-hansı bir təlatüm bütövlükdə ölkəni çalxalaya və faciləi nəticələrə gətirib çıxara bilər. Dərnəgül yolu, Koroğlu Rəhimov, və digər mərkəzi yollarında eyni vaxtda plansız və ya "planlı" aparılan təmir işləri, alternativ yolların da tıxacdan bağlanmasına səbəb oldu. Bütün istiqamətlərdə müşahidə etdiyimiz mənzərə eyni idi: sürücülər bir-biri ilə, yol tikintisi ilə məşğul olan işçilərlə və hərəkəti tənzimləməyə çalışan polislərlə üz-üzədirlər. Söyüş, təhqir, hədə qorxu və zaman-zaman yaxalaşmanın müşahidə edildiyi nəzərə alınarsa, gördüklərimizin böyük bir "xaos planı"nın bir hissəsi olduğunun fərqinə varmış olarıq.
Bütün yollar niyə eyni vaxta təmir edilir?
Təmirə bağlanmış yollarla şəhər sakini olaraq hər birimiz gündəlik hərəkət edirik. Dərnəgül yolundakı təmiri, körpü tikintisini anlamaq olar, amma bu işin niyə bu qədər savadsız, qabiliyyətsiz, tikinti planından kənar aparıldığını isə anlamaqda çətinlik çəkirik. Yollara üzərində "BAKI ŞƏHƏR İCRA HAKİMİYYƏTİ, YOL TƏMİRƏ BAĞLIDIR" sözləri yazılmış lövhə bərkidilmiş iri beton bloklarla kəsilmiş yollarda şəhər sakinləri əsəblərini xərcləyir, bir-biri əlbayaxa davaya girişməkdən başqa yol tapa bilmirlər. Paytaxtın ən işlək küçələrindən biri olan Koroğlu Rəhimovda aparılan təmirin isə tam anlaşılmaz olduğunu xüsusi qeyd etmək istəyirik. Küçənin asfalt örtüyündə heç bir ciddi qüsur olmasa da Hacıbala Abutalıbovun göstərişi ilə həmin küçənin asfalt örtüyü sökülərək yenisi çəkilir. Hacıbala Abutalıbovun Bakı Şəhər İcra Hakimiyyətində yaratdığı korrupsiya piramidası hər il təmirə ehtiyacı olmayan onlarla paytaxt küçəsinin asfaltını yeniləməklə milyardlarla manat vəsait mənimsəyirlər. Artıq hər qarışı qızıl olan, dünyanın həm torpaq sahəsi həm də daşınmaz əmlak qiymətlərinə görə ən bahalı şəhərlərindən sayılan Bakı, Hacıbala Abutalıbov və ətrafına topladığı korrupsioner dairənin boyunduruğu altındadır. Hər il Abutalıbovun rəhbərlik etdiyi korrupsiya piramidası milyardlarla manat vəsaiti mənimsəyərək ofşor zonalara axıdır. Bakı Şəhər İcra Hakimiyyətinin demək olar ki, bütün məmurlarının xaricdə evləri, mülkiyyətləri və bank hesabları var. Hacıbala Abutalıbov həmişə öz korrupsiya piramidasına daxil olanların arxasında durması ilə tanınır. Bütyün yollar isə planlı olaraq eyni vaxtda bağlanır, planlı suratdə əhalinin əsəbləri tarıma çəkilir və insanlar konfliktə, qarşıdurmaya cəlb olunur.
Hacıbala Abutalıbovun "xaos planı"
Yolun hələ bir neçə gün də nəqliyyatın hərəkəti üçün bağlı olacağı deyilir. Heydər Əliyev adına Beynəlxalq Hava Limanının, Heydər Əliyev prospektinin, Təbriz küçəsinin, Gənclik metrostansiyasının ətraf küçələri ilə bağlayan Koroğlu Rəhimovun bağlanması şəhərin bütün mərkəzi hissəsində nəqliyyatı iflic vəziyyətinə salıb. Tıxaclar bu gün də davam edir. Tıxacların səbəb olduğu əsəblər isə əhalimizin hökumətimizə olan güvənini sarsmağa hesablanıb sanki. Rəngli inqilablar hazırlayan bir çox dövlətlərin xüsusi xidmət orqanları üçün Hacıbala Abutalıbov kimi məmurlar göydəndüşmədir. Onların əhali arasında yaratdığı ciddi narazılıqlar daha sonra qısa müddət ərzində sosial şəbəklər və beynəlxalq media qurumları tərəfindən tirajlanaraq ictimailəşdirilir, vətəndaşlar arasındakı xüsusi hazırlıqlı təxribatçılar hərəkətə keçərək qarşıdurmaları və toqquşmaları qızışdırır və "xaos planı" mərhələlərlə həyata keçirilərək ölkədə qarışıqlıq yaradılır. Hacıbala Abutalıbovun bu gün Bakı şəhərində həyata keçirdiyi destruktiv fəaliyyət həm külli miqdarda vəsaitin büdcədən oğurlanmasına, həm də ölkəni xaosun astanasına çəkib aparmaqdadır. Hacıbala Abutalıbovun Bakıda yürütdüyü "siyasət"in arxasında duran məsələnin məhz "xaos planı" olmasını isə şəhərdə gedən prosseslər bir daha sübut edir.
Monitorinq şobəsi
Ölkə.az
