"Məhbuslar arasında baş verən insidentlərə görə həbsxana rəhbərliyi məsuliyyət daşıyır"
Cəzaçəkmə müəssisələrində xırda tipli münaqişələr hər gün qeydə alınsa da, kütləvi davalar çox nadir hallarda baş verən hadisədir. Belə hadisələrdən biri ötən gün 6 saylı cəzaçəkmə müəssisəsində qeydə alınıb.
Heç kimə sirr deyil ki, əsəbləri tarımara çəkilmiş, ətrafdan təcrid olunmuş bu insanların davaları daha sərt və qorxunc olur. Təcrid olunmuş insanların kütləvi davalarının hansı qorxunc sonluqla bitəcəyini isə təsəvvür etmək bir az çətindir.
Bəs ümumilikdə bu cür hadisə baş verdikdə hansı tədbirlər həyata keçirilmədir?
Mövzu ilə əlaqədar Ölkə.az xəbər portalına hüquq müdafiəçisi Elman Fəttah danışıb. Hüquq müdafəçisi bildirib ki, belə hallarda bütün məsuliyyət birbaşa müəssisənin inzibati heyətinin üzərinə düşür.
"Cəzaçəkmə müəssisələrində məhbuslara qarşı münasibətdə yəqin ki, qanundankənar hərəkətlərə, onların hüquqlarının daha da məhdudlaşdırılması ilə bağlı sosial və maddi təminatlarında yetəri qədər dövlət qanununda müəyyən edilmiş məsələlərin təmin edilməməsinə görə etirazlar var və bu etirazları heç cür birüzə verilməsi mümkün olmadığına görə etirazlar sərt formada üzə çıxır.
Bu cür halların baş verməsinin qarşısını almaq həmin müəssisənin inzibati heyətinin vəzifə məsuliyyətidir və bu məsuliyyət birbaşa onların üzərinə düşür. Onlar öz işlərini o şəkildə qurmalıdır ki, məhbusların bir-birinə qarşı nə kəskin münasibətləri formalaşmalı, nə də ki, bu cür münaqişələr baş verməli deyil. İdarəçilik ədalətli şəkildə qurulmalı və məhbuslar arasında ayrıseçicilik olmamalıdır. Yəni bunlar müəssisənin, pentensiarın idarə heyətinin, rəhbərliyinin birbaşa məsuliyyətidir. Məhbuslar arasında hamıya qarşı bərabər münasibəti formalaşdırmaq mütləqdir".
Xatırladaq ki, Ədliyyə Nazirliyi Penitensiar Xidməti 6 saylı Cəzaçəkmə Müəssisəsində məhbuslar arasında kütləvi dava faktı qeydə alınmışdı. Münaqişənin məişət zəminində baş verdiyi iddia edilirdi.
Milli.az-ın məlumatuna görə, Nizami rayonu ərazisində yerləşən 6 saylı cəzaçəkmə müəssisəsində məhkumlar arasında güclü dava zamanı məhkumlar iki dəstəyə bölünüblər. Bir tərəfdən 12, qarşı tərəfdən isə 5 nəfər bir-birinə girib. Davanı sakitləşdirmək üçün müəssisə əməkdaşları işə qarışsalarda, uzun sürən davanı çətinliklə yatırmaq mümkün olub.
Ölkə.az
