“Sovetski”də sökülməyəcək binalar

Paytaxtın “Sovetski” adlanan ərazisində abadlıq və yenidənqurma niyyəti ilə söküntü aparılsa da, bu ətrafda tarixi və memarlıq əhəmiyyəti daşıyan binalara toxunulmayacaq.

Ölkə.Az bildirir ki, salamnews-a bunu Azərbaycan Memarlar İttifaqının (AMİ) sədri, Şərq ölkələri Beynəlxalq Memarlıq Akademiyasının həqiqi üzvü və vitse-prezidenti, Beynəlxalq Memarlıq Akademiyasının (YUNESKO) və Beynəlxalq Memarlar İttifaqının (UİA) professoru Elbəy Qasımzadə deyib.

O bildirib ki, hazırda sökülən ərazidə yüzə yaxın əhəmiyyətli bina mövcuddur.

Memar dediklərinə misal kimi AMİ-nin Murtuza Muxtarov küçəsi-24 ünvanında yerləşən ikimərtəbəli binanı göstərib. Bura Bakı milyonçusu Ağabala Quliyevin yaşayış evi olub. Bina 1899-cu ildə memar Yevgeniy Yakovleviç Skibinskinin layihəsi əsasında tikilib. “Sovetski” ərazisi layihəsi ilə bağlı bu binanın, hətta, sürüşdürülməsi təklifi də gündəmdə olub. Amma hərtərəfli təhlillər evin fiziki durumunun buna imkan verməyəcəyini göstərib. İndi yenidənqurma ilə bağlı işlər görülərkən binanın qarşı tərəfi istiqamətində küçə genişləndiriləcək. Ərazidə olan digər binalara münasibət də bu cür olacaq.

Azərbaycan Memarlar İttifaqının yerləşdiyi binadan bəzi fraqmentləri oxuculara təqdim edirik.