"Bu tələbələri soymaqdan başqa bir şey deyil"

Azərbaycan Respublikası Nazirlər Kabinetinin qərarına görə, kəsri olan tələbələr 2014-cü ildən etibarən alt qruplarda oturmaq üçün əlavə ödəniş ödəməlidirlər. Qərar qəbul edildiyi gündən etibarən bu tələbələrin ciddi narazılığına səbəb olmuşdu. Müvafiq qərara əsasən, alt qruplarda oturmaq üçün tələbə ödəniş etmək məcburiyyətindədir. Bəs, məsələnin alternativ çıxış yolu varmı?

Ölkə.Az mövzu ilə əlaqədar olaraq keçmiş təhsil naziri Firudin Cəlilov və keçmiş TQDK sədri Vurğun Əyyubun fikirlərini öyrənib.

Firudin Cəlilov: "Bu tamam yanlış bir şeydir, tələbələri soymaqdan başqa bir şey deyil. Qərarı mütləq dəyişmək lazımdır. Biz əksinə tələbələrə şərait yaratmalıyıq ki, onlar əziyyət çəkməsin, təhsildən kənar qalmasın, ancaq biz şərtləri süni yollarla dəyişdirib, gəncləri elm dalınca getməyinin qarşısını alırıq. Yaxşı bir tələbənin atasının tutaq ki, imkanı var və onu ödəyir, bəs, kasıblar nə etsin? Ödəyə bilmirsə, universitetdən xaric olunmaldır?

Əgər tələbə lazım olan xalı yığa bilmirsə, ona təhsilini davam etməyə imkanlar yaratmalı, güzəştlər edilməlidir. Yəni, asanlaşdırmaq əvəzinə çətinləşdirmək olmaz"

-Xatırlayırsınızsa, pullu təhsil sistemini ilk dəfə qanuna siz əlavə etmişdiniz...

Bəli, amma o vaxt, yəni 1992-ci ildə ölkədə pul yox idi, universitetlərin maddi imkanı pis idi. Dövlət üniversitetlərinə 30% ödənişli, 70%-də dövlət hesabına ayırmışdıq. Amma indi fikir versəniz tam tərsinədir. Bu isə ədalətsizlikdir. İkinci dəfə eyni fəndən imtahan verən tələbədən yenə pul alınması da ədalətsizlikdir. Bütün bunları düzəltmək isə birbaşa təhsil nazirliyinin öhdəsinə düşür. Gərək onlar bu işlə ciddi məşğul olsunlar.

Vurğun Əyyub: "Xəzər universitetində tələbə kəsildi, o fəndən qiymət ala bilmədisə, gedib pulunu ödəməlidir də. Mən ona bir də dərs deyirəmsə, niyə müftə dərs deməliyəm? Dövlət universitetlərində ödənişli təhsili isə mən qəbul etmirəm, amma tələbə ödənişli təhsildədirsə, o pul ödəyib təhsil alır. İmtahanda keçə bilmədikdə isə ona yenidən dərs deyilir. Deməli ödəməlidir də".

Qeyd edək ki, hazırda universitetlərdə problemin birbaşa həlli üçün ölkədə fəaliyyət göstərən bütün universitetlərin tələbələrindən imza toplanılır. Tələbələrin əsas istəyi isə qanuna müəyyən dəyişikliklərin edilməsidir.

Fatimə İbrahimova

Ölkə.az