Bakı Yeni ilə necə hazırlaşır?

Yeni ilin gəlməsinə bir aydan da çox var, ancaq Bakıda artıq Yeni ilin gəlişi ilə əlaqədar qızğın hazırlıq işləri görülməyə başlanıb.

Ölkə.Az saytı sizi paytaxtımızda aparılan Yeni ilə hazırlıq işləri ilə tanış edəcək.

Şəhərdə artıq bir neçə yerdə hündür Yeni il yolkaları quraşdırılır. Yolkaların və digər aksesuarların quraşdırılmasını öz gözümüzlə görmək üçün Bakının mərkəzi küçələrindən sayılan Nizami küçəsinə (Tarqovı) yollandıq.

Hündür yolkanın quraşdırıldığı yerə gəlirik. Səhər tezdən olmasına baxmayaraq yolka ətrafında gərgin iş gedir. Kranlar aksessuarları quraşdırır, işçilər yolkanın "qol-qanad"ını daşıyırdılar.

İşçilərə yaxınlaşırıq. Öncədən bildirilər ki, "intervyu" verməyə icazə vermirlər, ancaq çəkiliş apara bilərsiniz. Yolkanın nə zaman yekunlaşacağı ilə maraqlanırıq. İşçilər bildirirlər ki, yolkanı dekabrın 1-i təhvil verməlidirlər.

Xatırladırıq ki, Nizami küçəsindəki yolkanın və konsert səhnəsinin quraşdırılmasını Bakı Şəhər icra hakimiyyəti "A+A Events" şirktinə həvalə edib. Adının çəkilməsini isəməyən şirkət nümayəndəsi yolkanın, Yeni il yarmarkasının və konsert səhnəsinin quraşdırılmasının maliyyəti barədə heç bir məlumatı olmdığını bildirdi. Şirkət nümayəndəsinin sözlərinə görə, Bakı meriyası şirkətə hündür yolka, yeni il yarmarkası üçün 20 ədəd taxtadan evcik və konsert səhnəsi sifariş verib. Ancaq deyilən yerə cəmi 16 taxtadan düzəldilmiş evcik yerləşdirmək olar.

Şirkət nümayəndəsi yolkanın 22 metr hündürlüyündə olduğunu bildirdi. Daha sonra Konsert səhnəsinin quraşdırıldığı yerə gəldik. Burda da işçilər dayanmadan işləyirdilər.

İşçilər bildirdilər ki, konsert səhnəsi dekabrın 4-də artıq istifadəyə veriləcək. Düzdür şəhərdə, insanların üzündə bayram əhval-ruhiyyəsi hələ müşahidə edilməsə də, şəhərdə Yeni ili yüksək səviyyədə qarşılamaq üçün çox ciddi iş gedir...