"Rauf Arifoğlu bunu böyük təəssüf hissi ilə deyib"

Yeni Müsavat qəzetinin baş redaktoru Rauf Arifoğlu son müsahibəsində bildirib ki, artıq internet-media yazılı mətbuatı sıradan çıxarmaq üzrədir. Ona görə də, "Yeni Müsavat"ın kağız versiyasını bir prestij, tarix kimi, imkanlı, pullu adamların oxuya biləcəyi bir versiya kimi saxlamaq istəyirik. Onun qiymətini gələcəkdə 5 manat etmək fikrimiz var. 3 min tirajla çıxsın, kim istəyirsə o qiymətə alsın. Kim evində qəzeti saxlamaq, o qiymətə onu almaq istəmirsə, almasın, müftə sayt oxusun. Xanımlar, köhnə kişilər qəzetin kağız versiyasından ləzzət alırlar. Bilincli şəkildə qəzetin qiymətini qaldıracağıq.

Rauf Arifoğlunun bu fikrinə milli mediamızın tanınmış kapitanlarından, hazırda fəaliyyətini dayandırmış "Ayna" və "Zerkalo" qəzetlərinin baş redaktoru Elçin Şıxlı, "525-ci" qəzetin baş redaktoru Rəşad Məcid və politoloq qismində AXCP funksioneri Razi Nurullayev Ölkə.az-a verdikləri açıqlamada münasibət bildirdilər.

Elçin Şıxlı: "Yeni Müsavat qəzeti Rauf Arifoğlunun özünündür. Özü necə istəyir elə də informasiya siyasət yeridir. Görünür o daxildən nə isə bilir, görür ki, qəzet oxunmur ona görə də belə qərara gəlib ki, qəzeti pullu adamlar oxusun. Hesab edirəm ki, bu çox maraqlı məqamdır".

Rəşad Məcid: "Yəqin Rauf Arifoğlu qəzetin qiyəmtini 5 manat edəcəyini zarafatla deyib. İnternet-media çıxandan sonra qəzetlərin kağız versiyasını oxumağa maraq azalıb. 1998-ci ildə Amerikada olanda bu məsələ çox qızğın müzakirə olundu. Orada da deyildi ki, qəzetlərin kağız variantını internet saytlar "yeyəcək" sıradan çıxaracaq. O zaman bu mənə nağıl kimi gəlirdi. Son 4-5 ildə internetin sürətli inkişafı, sosial medianın inkişafı onu göstərdi ki, nə vaxtsa qəzetlərin kağız variantı sıradan çıxa bilər. Ona görə də, ömrünü qəzetçiliyə həsr etmiş bir adam kimi Rauf Arifoğlu bunu təəssüflə deyib. Məncə yaxın 20 ildə qəzetlərin kağız variantı hələ qalacaq. Ancaq fakt faktlığında qalır ki, elektiron media kağız medianı sıradan çıxarır. Kino çıxanda da deyirdilər teatrı sıradan çıxaracaq ancaq teatr hələ də yaşayır".

Razi Nurullayev: "Son vaxtlar insanlar xüsusi ilə mobil internetdən xəbərləri oxuduğuna görə yəqin ki, bir müddətdən sonra kağız üzərindəki çap dayandırılacaq. 5 manata bir qəzetin çıxarılması qəzet kimi yox, jurnal kimi mümkün ola bilər. Açığı son zamanlar qəzet almıram, informasiyanı mobil telefonun köməyi ilə internetdən alıram".

Səxavət Məmməd
Ölkə.az