Beynəlxalq bankın müdiri şəhid ailəsinin puluna göz dikdi

Beynəlxalq Bankın şöbə müdiri şəhid ailəsinin 1400 manatına göz dikdi.

Ölkə.Az-a daxil olan məlumata görə, Beynəlxalq bankın Ucar rayon filialının müdiri Tariel Niftəliyev şəhid ailəsi olan Ucar rayonu Bağman kənd sakini Kərimova Gülabatın Müseyib qızına məxsus 1400 manat vəsaiti onun kartından çıxarıb. Kərimova Gülabatın pullarını tələb edəndə isə bankdan gah "kartın kodları qarışıb", gah da "başqası tərəfindən çıxarıldığı" deyilib.

Məsələni dəqiqləşdirmək üçün şəhid ailəsi ilə əlaqə yaratdıq. Kərimova Gülabatın bildirdi ki, onun həyat yoldaşı 20 Aprel 1994-cü il tarixində Qarabağın azadlığı uğrunda gedən döyüşlərdə şəhid olub:

"Buna görə də şəhid ailəsi olduğumuz üçün hər ay bizə qanunda nəzərdə tutulmuş qaydada 200 manat müavinət verilir. Həmin müavinəti Ucar rayonunun mərkəzində yerləşən Beynəlxalq Bankın filialının bankomatından götürürdüm. Bu ilin may ayı tarixindən müavinətimi götürmədim ki, yığılsın ilin sonunda götürüb oğluma toy edərəm. Noyabr ayının əvvəlində məni Beynəlxalq Bankın Ucar rayon filialının müdiri Tariel Niftəliyev çağırıb dedi ki, kodlar qarışıb, buna görə bankomat kartları dəyişdirilir. O mənə ərizə yazdırdı və bankomat kartımı məndən aldı. 23 Noyabr 2014-cü il tarixində çağırıb kartımı özümə verdi. Kartı bankomata salıb yoxladıqda məlum oldu ki, may ayından yığılmış 1400 manat pulumu çıxarıb götürüblər. Həmçinin yoxlayanda o da məlum oldu ki, həmin kartda heç bir kod dəyişikliyi olmayıb. Beynəlxalq Bankın Ucar filalının müdiri Tariyel Niftəliyev bildirdi ki, biz pul götürməmişik, hətta utanmadan həyasızcasına üstümə də qışqırdı.

Beynəlxalq bankın Ucar filialının müdirinin bu hərəkətləri bizim ailəni çox sarsıtdı. Çünki biz boğazımızdan kəsib bu pulu toplamışdıq ki, şəhidin yeganə övladına toy edək, ancaq Tariyel Niftəliyevin fırıldaq əməli bizim ailənin arzusunu gözündə qoydu. Mənim həyat yoldaşım Sahib Kərimov Vətən, torpaq uğrunda şəhid olub. Buna görə biz fəxr edirik, vətənin başı sağ olsun. Ancaq şəhid ailəsinə qarşı edilən bu əməl özbaşınalıq, soyğunçuluq və quldurluqdur. Şəhid ruhuna edilən hörmətsizliyə göz yummaq özü də mənəviyyatsızlıq olar.

Beynəlxalq Bankın Ucar filialının müdiri Tariyel Niftəliyev 3 gün öncə bildirdi ki, pulu bankomatdan başqası çıxarıb. Bunu araşdırıb pulu bu gün üçün qaytaracağıq, ancaq nə pulu qaytardılar, nə də bir xəbər etdilər.

Mətbuat vasitəsi ilə Prezident cənab İlham Əliyevə, Mehriban xanım Əliyevaya, Baş Prokurora, Korrupsiyaya Qarşı Mübarizə İdarəsinin rəisinə və digər aidiyyatı orqan rəhbərlərinə müraciət edib xahiş edirəm ki, bu cinayət faktını obyektiv araşdırıb, ciddi tədbirlər görsünlər. Şəhid ruhuna hörmətsizlik edən cinayətkarlar ən ağır cəza ilə cəzalandırılmalıdır",- deyə şəhidin həyat yoldaşı bildirib.

Yazıda adı çəkilən bütün şəxslərin mövqeyini dərc etməyə hazırıq. Mövzunu davam etdirəcəyik.

Səxavət Məmməd

Ölkə.az