Bu ilin birinci yarısında 159 azərbaycanlı Ukrayna vətəndaşlığını qəbul edib

Ötən ildə ərazi mənşəyinə görə Azərbaycan vətəndaşı olan 303 nəfər Ukrayna Dövlət Miqrasiya Xidmətinin (DMX) ərazi orqanlarının qərarı ilə sadələşdirilmiş qaydada Ukrayna vətəndaşlığı alıb.

Bu barədə "Report"un Ukrayna bürosuna ölkənin Vətəndaşlıq, Pasportlaşdırma və DMX-nin Qeydiyyatı Departamentindən məlumat verilib.

Qurumdan bildirilib ki, 2016-ci ildə 22 azərbaycanlı Ukrayna prezidentinin müvafiq sərəncamına əsasən Ukrayna vətəndaşlığı alıb.

Departamentdən son 5 ildə DMX-nin ərazi orqanlarının qərarına əsasən, Ukrayna vətəndaşlığı alan azərbaycanlıların statistikası da təqdim olunub. Belə ki, bu rəqəm 2012-ci ildə 106, 2013-cü ildə 462, 2014-cü ildə 312, 2015-ci ildə 198, 2016-cı ildə isə 303 nəfər təşkil edib.

Bu ilin birinci yarısında 159 azərbaycanlıya Ukraynada vətəndaşlıq verilib.

Bundan əlavə, Ukrayna prezidentinin sərəncamı ilə Azərbaycan Respublikasının vətəndaşları Ukrayna vətəndaşlığına qəbul edilib: 2012-ci ildə 37, 2013-cü ildə 72, 2014-cü ildə 49, 2015-ci ildə 22, 2016-cı ildə isə 22 nəfər.

Bu ilin ilk altı ayı ərzində 8 nəfər prezidentin müvafiq fərmanına əsasən Ukrayna vətəndaşlığına qəbul edilib.

Ölkə.Az