"Başa düşməlidirlər ki, indi onların qarşısında 30 il əvvəlki Azərbaycan durmayıb" - Jalə Əliyeva

Bu sözləri “Ölkə.Az”a açıqlamasında millət vəkili Jalə Əliyeva oktyabrın 11-də ermənilərin Gəncədə törətdikləri qətliamdan danışarkən deyib.

“Ermənilər bu 32 ildə öz həqiqi simalarını dəfələrlə göstəriblər. Onlar XX əsrin ən böyük faciəsi olan Xocalı qətliamını, soyqırımını törədiblər. Ermənilərin Xocavənddə, Şuşada, Laçında, Kəlbəcərdə, Laçında davamlı olaraq əlləri bizim mülki vətəndaşların qanına bulanıb. İllərlə uşaqlarımız, qadınlarımız qətl edilib, süngülərdən keçirilib. Müharibənin öz şərtləri var, bunu bütün dünya anlamalıdır. Bu günə kimi Azərbaycan həqiqətini görməyən eşitməyən, lal-kar dünya, yəqin ki, bu vəziyyətdən, bu son terror əyləmindən sonra nəhayət ki, işğalçıya öz yerini göstərməlidir. Əks halda Ermənistanın həddini aşan hərəkətləri artıq sadəcə Azərbaycan üçün deyil, bütün dünya üçün təhdid olacaq”.

Millət vəkili erməni hakimiyyətinin terror hərəkətləri ilə öz millətini də məhvə sürüklədiyini bildirib.

“Paşinyanın və onun rəhbəri olduğu ölkənin hərbi xuntasının, rejiminin həyata keçirdiyi bu əməllər birinci növbədə öz vətəndaşına yönəlib. Bu gün onlar Azərbaycana qarşı bu terroru həyata keçirirlərsə, unutmasınlar ki, eyni zamanda öz xalqlarını məhvə doğru aparırlar. Başa düşməlidirlər ki, indi onların qarşısında 30 il əvvəlki Azərbaycan durmayıb. Bu gün onlar qüdrətli ordusu, güclü iqtisadiyyatı olan bir dövlətlə mübarizə aparırlar. Ona görə də Azərbaycanın verdiyi ultimatumların hamısı öz yerini tapacaq. Bu gün bizim Ali Baş Komandanımız öz iradəsini, qətiyyətini ortaya qoyub. Bunlar sadəcə nümayiş deyil, bu sözlərin arxasında həqiqətən də güclü bir dövlət var. Cənab Prezident  dediyi kimi, Azərbaycan heç bir dövlətin torpağını işğal etməyib, öz ərazisini, öz torpağıni qoruyur. Eyni zamanda 30 ildən artıq işğal altında qalan torpaqlarımızı son kəndinə qədər azad etmək uğrunda ədalət mübarizəsi aparır. Biz sözümüzdə, əməlimizdə qətiyik, bizi heç bir şey geri döndərə bilməyəcək. Çünki bu gün dünyaya iqtisadi, hərbi gücümüz ilə bərabər çox əhəmiyyətli bir qüvvə də nümayiş etdiririk. Bu dövlət, xalq və ordu üçgən gücünü nümayiş etdiririk. Əlbəttə ki, ordusu, xalqı və dövlət başçısı bir yerdə olan millət qalibdir. Biz mütləq qalib gələcəyik, son qarışa qədər mübarizə aparacağıq”.

Vüsalə Balayeva
Ölkə.Az