Əslən Zəngilandan olan müğənni Prezidentin qələbə müjdəsini BELƏ QARŞILADI

Azərbaycanın tanınmış sənətçiləri öz sevinclərini “Ölkə.Az”la bölüşərək, Azərbaycan Ordusuna, Ali Baş Komandana öz təşəkkürlərini bildiriblər.

Müğənni Aslan Hüseynov “Ölkə.Az”ın əməkdaşı ilə söhbətində bu xəbəri çox sevinc hissi ilə qarşıladığını bildirib:

“İnanırsız, bu xəbəri eşidəndə mənə yuxu kimi gəldi. Cənab Prezident ilk dəfə Zəngilanın işğaldan azad olunmasını elan edəndə qulaqlarıma inana bilmədim.  Çox xoşbəxtəm ki, Ali Baş Komandanın və şanlı ordumuzun sayəsində bu günləri yaşamaq bizə nəsib oldu. Sevincimin həddi-hüdudu yoxdur”.

İfaçı Zəngilanla bağlı uşaqlıq xatirəsini də dilə gətirib:

“Axırıncı dəfə Zəngilanda uşaqlıqda olmuşam. Bizim kəndimiz Nüvədidir. Əvvəllər o kənd Zəngilanın tərkibində idi. Sonradan kənd Ermənistanın ərazisinə daxil edildi. Zəngilana gedəndə əvvəl qatarla Mincivan stansiyasına, oradan avtomobillə Nüvədiyə gedirdik. Çox uşaq idim deyə, yaddaşımda xəyal kimi qalıb. İndi uşaqlıqda gördüyüm yerləri yenidən ziyarət etmək imkanım olacağını düşündükcə həyəcanlanıram. Bütün günü əsgərlərimizə dua edirəm, bizim də əlimizdən bu gəlir. Bu yaxınlarda Tərtər zonasında olduq, əsgərlərimizlə görüşdük. Mən orada əsgərlərimizdə olan döyüş əzmini, ruh yüksəkliyi gördükcə çox qürurlandım.  Mən çox sevinirəm ki, bizim xalqımız cənab Ali Baş Komandanın ətrafında bir ailə kimi birləşib. Mən Prezidentimlə, şanlı ordumla və xalqımla fəxr edirəm”.

Vüsalə Balayeva

Ölkə.Az