“Hər zaman olduğu kimi bu gün də Azərbaycanın yanındayıq“ - Türkiyə səfirliyi

“Ölkə.Az” xəbər verir ki, qardaş ölkənin səfirliyi şəhidlərin xatirəsini hörmətlə yad etdiyini və daima Azərbaycanın yanında olduğunu vurğulayıb:
“Xocalıda 29 il əvvəl şəhid olan bacı-qardaşlarımızın əziz xatirəsini hörmətlə yad edir və Allahdan onlara rəhmət diləyirik.
Hər zaman olduğu kimi bu gündə də Azərbaycanın yanında olduğumuzu bildiririk”.

Türkiyənin Azərbaycandakı səfirliyinin mətbuat müşaviri Hüseyn Altınalan  Xocalı soyqırımı ilə bağlı mövqeyini açıqlayaraq deyib ki, 26 fevral 1992-ci ildə 613 günahsız mülki şəxsin qətlə yetirildiyi o "Qara Gecə"ni unutmadıq və cinayətkarların hesab verəcəyi günə qədər mübarizənin davam etdiriləcəyini vurğulayıb:

“Hafizəmizi diri tutaraq bu vəhşiliyi unutmayacağıq. Cinayətkarların hesab verəcəyi günə qədər mübarizəmizi davam etdirəcəyik. 29 il əvvəl gözü dönmüş erməni dəstələri tərəfindən qətlə yetirilən qardaşlarımıza Allahdan rəhmət diləyirik”. 

Türkiyənin Azərbaycandakı səfiri Erkan Özoral isə qeyd edib ki, gün gələcək Xocalıda yurdlarından didərgin düşən insanlar öz torpaqlarına qayıdacaqlar: 

“Xocalı qətliamının günahkarları, insanlara qarşı vəhşilik törədənlər öz günahlarını çəkməlidirlər. Artıq Müzəffər Azərbaycan ordusu ərazi bütövlüyünü bərpa edib. İnşallah yaxın zamanda Xocalıdan didərgin düşən şəxslər öz torpaqlarına qayıdacaq. Xocalıda şəhid olanların da ruhu şad olacaq”.

Qeyd edək ki, Erkan Özoral Xocalı faciəsinin 29-cu ildönümü ilə əlaqədar  “Ana fəryadı” abidəsini ziyarət edib.

Mürtəza
Ölkə.Az