“Sülhməramlılar öz missiyasından daha çox tərəfkeşlik edirlər”

Bunu "Ölkə.Az"a açıqlamasında Xocalıdan olan millət vəkili Elman Məmmədov deyib.

Millət vəkilinin sözlərinə görə, sülhməramlılar bu ərazidə ermənilərə ən müxtəlif formada humanitar yardım edirlər.

"Xocalıda onlara tibb məntəqəsi açırlar, ən kiçik kənddə yaşayanları humanitar yardımla təmin edirlər. Sülhməramlıların bütün fəaliyyəti və məqsədi ermənilərin bu ərazidə möhkəmləndirməsinə və yenidən gücləndirməsinə xidmət edir. Buradan qaçıb gedən ermənilər harada varsa, yenidən tapıb gətirirlər ki, qorxmayın, biz burdayıq, kimsə sizə toxuna bilməz", - millət vəkili qeyd edib.

Azərbaycan-Rusiya münasibətlərinə toxunan millət vəkili deyib ki, Azərbaycanla Rusiya arasında münasibətlər çox yüksək səviyyədədir və bu əlaqələr günü-gündən inkişaf edir: "Qonşu dövlət olaraq əməkdaşlığımız dərinləşir. Ancaq bir həqiqət var və bu da bir tarixi həqiqətdir. Bu da ondan ibarətdir ki, son 200-250 il ərzində erməniləri dünyanın ən müxtəlif yerlərindən bizim torpaqlarımıza gətirən məhz sülhməramlıları təmsil edən dövlət yerləşdirib. Ermənilərə dövləti yenə də həmin sülhməramlıların təmsil etdiyi dövlət qurub. Bu müddət ərzində ya özləri, ya da ermənilərin əli ilə bizə zülm ediblər. Bu gün də o proses davam edir.

Tarixin heç bir dönəmində, istər Çar Rusiyası, istər sovetlər, istərsə də bugünkü RF dövründə olsun, bunlar heç vaxt sülhməramlı olmayıb. Onlar hər zaman işğalçı olublar. Hər hansı problem həll etməyiblər, əksinə problem yaradıblar. Bu gün də 1923-cü ildə bünövrəsini qoyduqları problemi davam etdirmək niyyətindədirlər. Onların bütün hərəkəti bu istiqamətə yönəlib.

Təsəvvür edin, bu gün Azərbaycan ərazisindən Azərbaycan bayrağı və dövlət nömrə nişanı altında hər hansı maşın və yük karavanı sülhməramlılarına nəzarət etdiyi ərazidən hərəkət etmək ixtiyarı yoxdur və buna imkan verilmir. Ancaq Rusiya bayrağı altında hərəkət edən maşınlar yük daşıyır. Bu iyrənc bir şeydir. İndi Avropa İttifaqının və digərlərinin mövqeyini tənqid edirik, amma bunda yox. Bu gün yenə də bu qüvvələrə birləşib bizə problem yaratmaq üçün yollar axtarırlar. Müxtəlif vasitələrə əl atırlar. Sülhməramlıların Xankəndidə parad keçirməsi məsələsi də buna xidmət edir".

Sülhməramlıların hərbi parad keçirməsinə toxunan deputat bildirib ki, parad keçirmək istəyirsən gəl Azərbaycanla birlikdə keçir: "Sənə Xankəndidə parad keçirməyə kim icazə verib?! Şuşada Azərbaycanın ordusu var və istəyirsən onlarla birgə orada parad keçir. Axı bununla nə demək istəyirsən?!

Sülhməramlıların digər ciddi məsələsi Laçın dəhlizindəki fəaliyyəti ilə bağlıdır. Oradan kimi istəyirlər onu aparıb, gətirirlər. Bu gün həmin sülhməramlılar Qarabağda hələ də fəaliyyətini davam etdirən cinayətkar separtçı rejimi ilə əməkdaşlıq edib, onlarla oturub dururlar, məsləhətləşirlər. Onları toxunulmaz edib, həbs edilməsinə imkan vermirlər. Sülhməramlıların nəzarətində olan Xocalı, Xocavənd, Ağdərə rayonlarında hələ də Ermənistana məxsus qalan hərbi silahlı birləşmələrə, Qarabağdakı separatçılara məxsus quldur, terrorçu dəstələri qalmaqdadır. Onlara dəstək, silah-sursat, ərzaq haradan gəlir, kimlər təmin edir? Təbii ki, Laçın dəhlizi vasitəsi ilə təmin olunurlar. Laçın dəhlizinə kim nəzarət edir? Təbii, sülhməramlılar. Onların missiyası nəzarət etdikləri ərazilərədən qalan hərbi birləşmələri, quldur, terrorçu dəsətləri tərk-silah edib, qayda-qanun, əmin-amanlıq yaratmaq, evlərindən didərgin düşən azərbaycanlı məcburi köçkünləri öz ata yurdlarına qayıtmasını təmin etmək idi. Amma etməyiblər. Bu istiqamətdə heç bir iş görməyiblər. Əksinə, bu ərazilərdən qaçıb gedən ermənilərə Xocalıya qaytarmaqla məşğuldur. Onların bu hərkəti çox davam edə bilməz. Azərbaycan dövləti və dövlət başçısı cənab İlham Əliyev bu istiqamətdə çox yüksək səviyyədə işlər görür. Hesab edirəm ki, bunların özbaşına hərkətinə son vermək üçün Azərbaycan mütləq hansısa ciddi addım atacaq. Azərbaycan ərazilərində qalan quldur, terror, təxribatçı hərbi dəstələri təmizləyib, tərk-silah etmək üçün anti-terror əməliyyatına başlamaq məcburiyyətində qalacaq. Bunu əslində sülhməramlılar etməlidir. Ancaq etmirlər. Əksinə, onlarla əməkdaşlıq edirlər. Odur ki, yeganə çıxış yolu Azərbaycan özü bu istiqamətdə tədbirlər görsün. Proseslər də buna doğru aparır".

Mürtəza
Ölkə.Az