Qələbə müjdəçiləri - Azad olunan kəndlər - FOTO
Daxili İşlər Nazirliyindən "Ölkə.Az"a verilən məlumata görə, işğaldan azad edilən kəndlərimizdə Tərtər Rayon Polis Şöbəsinin əməkdaşları qısa zamanda fəaliyyətə başladı. Suqovuşan və Talış kəndlərində polis məntəqələri yaradıldı. Həmçinin Suqovuşan kəndinə gedən yolun ərazisində Daxili Qoşunların hərbi qulluqçuları ilə birgə stasionar post quruldu, kənd ərazisinə giriş-çıxış nəzarətə götürüldü. Polis əməkdaşları tərəfindən kəndlərdəki tərk edilmiş hərbi mövqelərdən və digər döyüş baş verən ərazilərdən xeyli sayda silah-sursatlar aşkar edildi. Keçirilən tədbirlərlə xeyli sayda avtomatlar, pulemyotlar, qumbaralar, hava hücumundan müdafiə silahları, tank əleyhinə qurğular, müxtəlif çaplı mərmilər və patronlar və digər döyüş üçün nəzərdə tutulmuş vasitələri aşkar edilərək aidiyyəti üzrə təhvil verildi. Bu istiqamədə tədbirlər davam edir.
Mülki əhalinin təhlükəsizliyinin təmin edilməsi məqsədi ilə zəruri tədbirlər həyata keçirilir, kəndlərin ərazisinə qanunsuz daxilolmaların qarşısı alınır. Bu cür qabaqlayıcı tədbirlərlə yanaşı, ətraf kəndlərdə yaşayan və eləcə də digər rayon sakinləri ilə profilaktiki səpkidə söhbətlər aparılır. İşğaldan azad edilmiş ərazilərdə mina və partlayıcı vasitələrin insan həyatına təhlükə yarada biləcəyi, faciəvi nəticələri olacağı barədə mütəmadi şəkildə vətəndaşlara məlumatlar verilir, xəbərdarlıqlar edilir.
Ümumilikdə isə polis əməkdaşları tərəfindən işğaldan azad edilmiş Suqovuşan və Talış kəndlərində bir il ərzində xidmətin yaxşılaşdırılması məqsədi ilə mütəmadi tədbirlər görülür. Hal-hazırda da kəndlərin ərazisində polis əməkdaşları qarşıya qoyulmuş tapşırıqları layiqincə yerinə yetirirlər.
