XTQ-dən Şuşa döyüşlərində aldatma əməliyyatı: "Ağlıma gəlməzdi ki, belə bir şey alınsın" - REAL KADRLAR

Ölkə.Az xəbər verir ki, Xüsusi Təyinatlı Qüvvələrin (XTQ) komandirlərindən biri əməliyyat zamanı unikal aldatma ilə tapşırığı uğurla icra edib. O bunun döyüş zamanı anidən ağlına gəldiyini söyləyib. 

XTQ komandiri həmin anları belə xatırlayır: "Komanda verdim ki, sağdan və soldan sızıb manevr edərək, qalxmaq imkanımız varsa, qalxaq. 20-25 dəqiqə müddətində orada açıq döyüş getdi. Onların Laçın yolunun kənarında əvvəlcədən hazırladıqları mövqeləri vardı. Bütün yol boyu Laçından Şuşaya qədər... İstər-istəməz özümdən asılı olmayaraq, qrup komandirlərinə şəxsi heyətlərini gətirmələri barədə komanda verib özüm də getdim. Artıq o iş görülməli idi. Sürətli şəkildə Laçın yolu istiqamətində qalxdıq. Laçın yoluna çatmamışdan - təqribən 50 metr olardı - üzərimizə atışlar gəldi. Düşmən yuxarıdadır və bizdən üstündür. Onlar üçün daha rahatdır. Biz 600 metr yüksəklik qalxdığımızdan yorğun idik".

Ardınca isə düşmənin aldadılması üçün rabitə ilə açıq efirə çıxıb:

"İstər-istəməz ağlıma gəldi və iki nəfər zabitimizin adını çəkdim. Hündürdən qışqırdım. Məlumatımız vardı ki, bizim dili sərbəst şəkildə danışacaq qədər bilirlər. Ucadan zabitin birini çağıraraq dedim ki, 50 nəfər götürərək sağ tərəfdən get. O birinə isə 60-70 nəfər götürüb sol tərəfdən getməsini bildirdim. Mən də 100 nəfərlə buradan qalxdığımı söylədim. 5-10 saniyədən sonra sadəcə müşahidə üçün başımı çıxartdım ki, yuxarı baxım. Atış gəlmədi və yanımdakı yoldaşa dedim ki, bunlar qaçdı. 15-20 saniyəyə 50 metr qaçdıq və Laçın yoluna çıxdıq. Gördük ki, Laçın istiqamətində qaçanlar var. Yenə də deyirəm, bəlkə də ağlıma gəlməzdi, belə bir şey edim və o nəticə versin. 6-7 nəfər orada öldürdük. Yaralı olanlar qaçdılar..."

Müsahibə "Şuşa, sən azadsan!" filmindən çıxarılıb. 

Qeyd edək ki, filmdə real döyüş kadrlarından da istifadə olunub.

Elvin