Azərbaycanı məcbur etmək mümkünsüzdür, imtina etməliyik - Kirakosyan

“Bir tərəfdən Qarabağ ermənilərinin düşdüyü çətin vəziyyətimiz var, digər tərəfdən isə bu vəziyyətdən necə çıxmaqla bağlı konkret proqramımız, yanaşmamız yoxdur. Düşünmürəm ki, Azərbaycanı Laçın vasitəsilə yolu açmağa məcbur etmək mümkün olsun”. 

Ölkə.Az xəbər verir ki, bunu Ermənistan Vətəndaş Cəmiyyəti İnstitutunun direktoru Artak Kirakosyan bildirib.

O hesab edir ki, ilk növbədə cəmiyyətdə (erməni cəmiyyətində) və ən azı dövlət orqanlarında “soyqırımı” ifadəsindən, “ermənilərə nifrət edən azərbaycanlı” və s. sözlərdən imtina etməlidirlər:

"Bu terminologiya problemi həll etmək üçün heç bir şəkildə kömək etməyəcəkdir. Baş verən hər şeyi “soyqırım” adlandırmayaq. Rasional dildə danışıqlar aparmalıyıq. Bir tərəfdən danışıqlar apardığımızı və sülhə çox yaxın olduğumuzu bəyan edirik və bundan sonra növbəti bəyanatda “Azərbaycan etnik təmizləmə siyasəti aparır” deyirik. Bunun nəticəsidir ki, belə bir sual yaranır: əgər danışıqlar mənasızdırsa, onda biz niyə danışıqlar aparırıq, o zaman bir çıxış yolu var - güc yolu ilə qərar verməyə hazırlaşmalıyıq".