Müasir büdcəmiz sosial öhdəlikləri nəzərə almaqla formalaşmalıdır

Bu sözləri Milli Məclisin komitələrinin birgə iclasında büdcə müzakərləri zamanı millət vəkili Siyavuş Novruzov deyib. S.Novruzov bildirib ki, 20 ildir Milli Məclisdə büdcə təsdiqində iştirak edirəm, ele eyni şey gəlir. Filan yeri azaltdıq, filan yeri artırdıq. Büdcə strukturunun müasir formasını tapmalıyıq. Büdcəmiz keçmiş sosializm dövründəkindən fərqlənməlidir. Yeni və fərqli büdcə strukturumuz olmalıdır. Keçmiş sosializmdən fərqlənməliyik.

Müasir büdcə necə olmalıdır? Bu suala iqtisadçı ekspert Vüqar bayramov "Ölkə.Az"da cavab verib:

"Hər dövrün özünə məxsus büdcəsi olmalıdır. Neft bumu dövründə büdcə daha çox infrastruktur layihələrinin reallaşmasını həyata keçirirdi. İndi post-neft dövrüdür. Post-neft dövründə büdcə gəlirlərinin və xərclərinin düzgün proqnozlaşdırılmasına ehtiyac var. Hazırda inkişaf etmiş ölkələrdə büdcənin əsas xərcini sosial xərclər təşkil edir. Elə Avropa ölkələri var ki, büdcədə sosial xərclər 90%-ə yaxındır. Bu baxımdan Azərbaycanda büdcənin xərc sturukturunun dəyişdirilməsi vacibdir.

Sosializim dövründəki büdcə ilə sosial yönümlü büdcə fərqlidir. Artıq bizdə sosial büdcə olmalıdır. Müasir büdcəmiz sosial öhdəlikləri nəzərə almaqla formalaşmalıdır. Xüsusən gəlirlərin və xərclərin uyğunlaşdırılmasına ehtiyac var. Büdcədə neftin qiymətindən asılılığı aradan qaldırmaq lazımdır. Büdcə birbaşa və daha çox qeyri-neft sektoru hesabına formalaşmış büdcə funksiyasını yerinə yetirməlidir. Müasir büdcə təbii ki, sosial büdcə olmalıdır. Eyni zamanda büdcə bir və ya az saylı mənbələrdən deyil, çoxsaylı mənbələr hesabına formalaşan büdcə rolunu oynamalıdır".

Səxavət Məmməd
Ölkə.Az