Zahid Oruc: “Belə təşkilatlar ölkələri, hakimiyyətləri təzyiq altında saxlamaq üçün fəaliyyət göstərir”

“Human Rights Watch” təşkilatının Azərbaycanla bağlı yaydığı hesabatı Millət vəkili Zahid Oruc Ölkə.az-a şərh edib.

Zahid Oruc: ” “Human Rights Watch” dünyanın idarəetmə siyasətinin tərkib hissəsidir. Bir qurum olaraq təşkilat bu məqsəd üçün təsis edilib. Faktiki olaraq insan haqları bir ölkənin sərhədlərindən kənara çıxandan sonra dünya çapında bir məsələyə çevrilir. Bu işi çox əlverişli beynəlxalq bir tutar kimi ayrı ayrı dövlətlərə təsir etmək üçün saxlayırlar və dövlətlərə təsir mexanizmi kimi ondan yararlanırlar. Ötən dövrdə də Azərbaycan əleyhinə yalnız anti hakimiyyət dairələrindən alınmış məlumatlar yerləşdirdiklərinə görə, bu qurumla ölkəmizin rəsmi orqanları arasında çox ciddi konsentasiya olub. 

Təşkilatın yaydığı hesabatında xüsusilə QHT sektoru ilə bağlı məlum qanunvericilik bazasına aid olan məsələlər daha çox qabardılıb. Bunlar hamısı ona xidmət edir ki, o QHT-lər onlarla işləyirlər. QHT-lər ölkə daxilində həmin təşkilatların dayaqlarıdır. Azərbaycan özünün maraqlarını, mənafeyini qorumaq üçün üçüncü sektorla bağlı hüquqi addımlar atan kimi dərhal beynəlxalq dairələrdən təzyiqlər işə salınır. Barak Obamanın çıxışında qeyd etdiyi fikirlər məhz bu qurumların rəyləri hesabına verilib. Kənarda belə bir rəy formalaşır ki, yəqin Azərbaycanda QHT adına cəmi 20-30 təşkilat olub, onların da hamısı həbsxanadadır. Bunlar hamısı yanlış məsələlərdir.

“Human Rights Watch” təşkilatı heç zaman Azərbaycanda görülən islahatları dəyərləndirməyəcək. Onlar üçün Leyla Yunusların məhkəməsi, azadlığa çıxması uğrunda mübarizə daha önəmlidir. Heç zaman “Human Rights Watch”da Qarabağ problemində zülm və zillət çəkən insanların pozulan haqları ilə bağlı fəaliyyətin görməyəcəyik. Qarabağ probleminə münasibət, o insanların taleyi ilə maraqlanmaq bir barometrdir. Bu məsələyə rəyini söylə deyim sən kimsən. Hesab edirəm ki, “Human Rights Watch”un məramı xoş deyil.

Bu cür təşkilatlar ölkələri, hakimiyyətləri təzyiq altında saxlamaq üçün fəaliyyət göstərir. Bunlar müxtəlif ölkələrin üzərinə yönləndirilən alətlərdi.

“Human Rights Watch”un heabatı Azərbaycanın gerçək hüquqi mənzərəsi deyil”.

Səxavət Məmməd

Ölkə.az