Lənkəranda əri tərəfindən döyüldüyü iddia edilən qadın öldü

Ötən gün Lənkəran Rayon Mərkəzi Xəstəxanasında rayonun Rvo kəndində qeydiyyatda olan, 1967-ci il təvəllüdlü Qafarova Mahirə Vəli qızı dünyasını dəyişib.

Dünyasını dəyişən qadının qohumlarının “Ölkə.Az”a verdiyi məlumata görə, Mahirə Qafarova 5 gün əvvəl döyülmüş vəziyyətdə “Qazel” markalı mikroavtobusla Rvo kəndinə atasının evinə gətirilib.

Ötən gün isə vəziyyəti ağır olduğundan xəstəxanaya aparılıb, orada da dünyasını dəyişib.

Qeyd edim ki, M.Qafarova Lerik rayonunun Barzalı kəndinə Allahyar adlı kişiyə ərə gedib. Allahyarın 1-ci həyat yoldaşı dünyasını dəyişdikdən sonra Mahirə ilə ailə həyatı qurub, birgə nikahdan övladları olmayıb. Ancaq Allahyarın 1-ci nikahdan 2 oğlu olub. Ehtimal var ki, Mahirəni, əri Allahyar döyüb”, - deyə qohumu bildirib.

Faktla bağlı Lənkəran rayon prokurorluğunda cinayət məcəlləsinin müvafiq maddəsi ilə cinayət işi başlanıb. Saxlanılan şəxsin olub-olmaması ilə bağlı məlumat almaq istəsək də, nə Lənkəran rayon prokurorluğu, nə də Baş Prokurorluğun Mətbuat Xidməti suallarımızı cavablandırmadı.