İddiaçılar turniri başa çatdı

Berlində keçirilən şahmat üzrə iddiaçılar turnirinin 14-cü - sonuncu turunda Azərbaycan qrossmeysteri Şəhriyar Məmmədyarov Rusiya təmsilçisi Vladimir Kramnik ilə görüşüb.

"Ölkə.Az" xəbər verir ki, qara fiqurlarla oynayan Ş.Məmmədyarov oyunun 54-cü gedişində rəqibi ilə heç-heçəyə razılaşıb və şahmatçılar hərəyə 0,5 xalla kifayətlənməli olublar. Hər iki şahmatçının ilk dövrədəki qarşılaşması Ş.Məmmədyarovun qələbəsi ilə nəticələnmişdi. Bu görüşdən sonra hesabında 3 qələbə, 10 heç-heçə və 1 məğlubiyyət olan Azərbaycan şahmatçısı aktivindəki xalların sayını 8-ə çatdırıb.

Lakin digər görüşdə Fabiano Karuana (ABŞ) Aleksandr Qrişuka (Rusiya) qalib gələrək 9 xalla turnirin qalibi olub.

Tur çərçivəsində keçirilən Uesli So (ABŞ) - Levon Aronyan (Ermənistan) və Liren Dinq (Çin) - Sergey Karyakin (Rusiya) qarşılaşmalarında qalib müəyyənləşməyib.

Bu nəticələrdən sonra Şəhriyar Məmmədyarov 8 xalla turniri ikinci yerdə başa vurub.

Sonrakı yerlər: 3-cü yer - Karyakin (8 xal), 4-cü yer - Dinq (7.5 xal), 5-ci yer - Kramnik (6.5 xal), 6-cı yer - Qrişuk (6,5 xal), 7-ci yer - So (6 xal), 8-ci yer - Aronyan (4.5 xal)

On dörd raunddan ibarət iddiaçılar turnirinin ümumi mükafat fondu 420 min avrodur. Berlin turnirinin qalibi Fabiano Karuana noyabrda Londonda dünya şahmat tacı uğrunda mübarizədə bu titulun hazırkı sahibi norveçli Maqnus Karlsen ilə oynayacaq.

Ölkə.Az