Evində qonağını öldürənə prokuror ağır cəza istədi

Xudatda həmyerlisini öldürməkdə təqsirli bilinən Bəxtiyar Çobanovun cinayət işi üzrə məhkəmə prosesi keçirilib.

“Ölkə.Az” xəbər verir ki, bu gün Bakı Ağır Cinayətlər Məhkəməsində hakim Ramella Allahverdiyevanın sədrliyi ilə baş tutan prosesdə məhkəmə istintaqının tamamlanması barədə qərar elan edilib.

Daha sonra ittiham nitqi ilə çıxış etmək üçün prokurora söz verilib. Prokuror çıxışı zamanı Bəxtiyar Çobanovun 18 il müddətinə azadlıqdan məhrum edilməsini təklif edib.

Sonra çıxış edən təqsirləndirilən şəxsin vəkili müvəkkilinin barəsində yüngül cəzanın verilməsini xahiş edib.

Növbəti proses martın 29-da davam edəcək.

İttihama görə, Xudat şəhərində 1964-cü il təvəllüdlü Bəxtiyar Çobanov 1968-ci il təvəllüdlü tanışı Hikmət Babayevi qətlə yetirib.

Məlum olub ki, Hikmət Babayev 2017-ci il oktyabrın 29-da Bəxtiyar Çobanovun Xudat şəhərində yerləşən evinə qonaq gəlib. Evdə içki məclisi qurulub.

Sərxoş olandan sonra tanışların sözü çəpləşib. Hikmət Bəxtiyarın ünvanına nalayiq ifadələr işlədib. Əsəbiləşən Bəxtiyar bıçağa əl atıb.

Hadisəni törədən Bəxtiyar Çobanov həbs edilib.

Ona qarşı Cinayət Məcəlləsinin 120.1-ci (qəsdən adam öldürmə) maddəsi ilə ittiham elan edilib.