Qadına görə qətl törədən polis rəisinin oğlunun məhkəməsi

“Ölkə.Az”a verilən məlumata görə, yaxın vaxtlarda hakim Əli Seyfəliyevin sədrliyi ilə cinayət məcəlləsinin 120.1-ci (qəsdən adam öldürmə) maddəsi ilə məhkumluq həyatı yaşayan Həsənov Orxan Ədalət oğlunun məhkəmə prosesi keçiriləcək. 

Xatırladaq ki, hadisə 2013-cü ilin  fevralın 2-də Gəncə şəhərində baş verib. Hüquq-mühafizə orqanlarından verilən məlumata görə, fevralın 2-də saat 23 radələrində Gəncə şəhərinin Kəpəz rayonunda Məmmədov Elnur Elşad oğlunu qətlə yetirmiş 1989-cu il təvəllüdlü Həsənov Orxan Ədalət oğlu Bakı şəhərində yaxalanıb. 24 yaşlı O.Həsənovu atası, Gəncə şəhər Nizami rayon Polis İdarəsinin əməkdaşı, polis polkovnik-leytenantı Ədalət Həsənov özü polisə təslim edib.

Hadisə münaqişə zəminində baş verib. O.Həsənov tanışı olan Elnur Məmmədovun boğaz nahiyəsini kəsərək onu qətlə yetirib. 24 yaşlı oğlanın tanışını qadın üstündə qətlə yetirdiyi də bildirilir.

Hadisədən sonra O.Həsənov Gəncəni tərk edib. Onun yaxalanmasında atası da iştirak edib və gənc oğlanın Bakı şəhərinin Nərimanov rayonu ərazisində olması müəyyən edilib. Daha sonra isə Ə.Həsənov oğlu ilə görüşüb və onu polis bölməsinə gətirərək istintaqa təhvil verib.

Qeyd edək ki, Orxan Həsənov qətl cinayətini törətməmişdən bir  müddət əvvəl oğurluq cinayəti ilə məşğul olan mütəşəkkil cinayətkar dəstənin üzvü kimi həbs edilib. Həmin zaman Gəncənin Kəpəz Rayon Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində Məhəbbət Məmmədovanın evindən 1 ədəd videomaqnitofon, geyim və ev əşyaları oğurlayan Gəncə şəhər sakinləri Elmin Bayramov, Orxan Həsənov, Tural Cəfərov və əvvəllər məhkum olunmuş Bəxtiyar Məmmədov tutulublar. Onların ətraflarında aparılan əməliyyat tədbirləri nəticəsində adıçəkilən şəxslərin Gəncə şəhər sakini Faiq Həsənovun evindən qızıl əşyaları oğurlamaları da müəyyən edilib. Həmin vaxt o, məhkəmənin hökmü ilə cərimə olunaraq azadlığa buraxılıb. 

Bundan sonra Gəncə şəhər Polis İdarəsi Nizami Rayon Polis Şöbəsinin Cinayət Axtarış Şöbəsinin rəisi, polis mayoru Ədalət Həsənov tutduğu vəzifədən azad edilib. Ancaq müəyyən müddətdən sonra Ədalət Həsənov əvvəlki vəzifəsinə bərpa oluna bilib.