Vəzifəli şəxslərin adından dələduzluq edənlər apellyasiya şikayəti veriblər

"Ölkə.Az" xəbər verir ki, Bakı Apellyasiya Məhkəməsində hakim Vaqif Mursaqulovun sədrliyi ilə təqsirləndirilən şəxslərin anket məlumatları dəqiqləşdirilib və məhkəmə baxışı aprel ayının 5-nə təyin edilib.

Belə ki, ötən il oktyabr ayının 5-də Bakı Ağır Cinayətlər Məhkəməsində hakim Rahib Salmanovun sədrliyi ilə baş tutan prosesdə dələduzluqda təqsirləndirilən 1978-ci il təvəllüdlü Alim İbrahimov və keçmiş məhkum, 1987-ci il təvəllüdlü Tərlan Comərdova hökm oxunub.
Alim İbrahimov 9 il, Tərlan Comərdov 11 il 6 ay müddətinə azadlıqdan məhrum ediliblər.

İttihama görə, Tərlan Comərdov və Alim İbrahimov Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham olunub. Tərlan Comərdov Sumqayıt sakinlərindən pul alıb qaytarmadığı üçün 2016-cı ilin avqust ayında 9 il müddətinə azadlıqdan məhrum edilib. Bundan sonra onun Alim İbrahimovla birlikdə başqa dələduzluq əməlləri ortaya çıxıb.

Hər iki şəxs Feyzulla Qasımova, Fikrət Qurbanova, Adil Həsənova və Həsən Yaqubova qarşı dələduzluq etməkdə təqsirli bilinirlər.
Zərərçəkmişlərdən biri olan Feyzulla Qasımov Baku Medical Plazada baş həkimin müavinidir. O, ifadəsində bildirib ki, özünü vəzifəli şəxs kimi təqdim edən Alim İbrahimov dostunun qızıl dükanından 16 min 800 manat dəyərində zinət əşyası götürüb və pulunu ödəməyib.

Təqsirləndirilən şəxslər sabiq polis rəisi və digər məşhur şəxslərə qarşı da dələduzluq ediblər. Onlar ümumilikdə vətəndaşların 151 min manat dəyərində pulunu ələ keçiriblər. 

Təqdirləndirilən hər iki şəxs Prezident Administrasiyası rəhbərinin sabiq müavini Əli Əsədovun və digər vəzifəli şəxslərin adından istifadə ediblər.