Ölümlə nəticələnən yol qəzası törədən polisin məhkəməsi

Ötən ilin dekabr ayının 28-də tibb bacısını avtomobillə vuraraq öldürən yol polisinin məhkəməsi başlayıb.

“Ölkə.Az”ın məlumatına görə, aprel ayının 5-də Nərimanov rayon məhkəməsində hakim Samir Məmmədovun sədrliyi ilə cinayət məcəlləsinin 263.2-ci (yol hərəkəti qaydalarını pozma – ehtiyatsızlıqdan zərərçəkmiş şəxsin ölümünə səbəb olduqda) maddəsi ilə təqsirləndirilən Nərimanov RPİ Dövlət Yol Polisi Şöbəsinin inspektoru, polis baş serjantı İbrahimli Nicat Əfqan oğlunun məhkəmə prosesi keçiriləcək. Cinayət işində zərərçəkmiş şəxs qismində İdrisov İdris Nemət oğlu və Məmmədov Seydi Eldar oğlu tanınıb.

Qeyd edək ki, ötən il dekabrın 28-də Bakı şəhəri Nərimanov rayonu F.Xoyski – 99 ünvanında yerləşən "Ruslan" marketin qarşısında Nərimanov RPİ Dövlət Yol Polisi Şöbəsinin inspektoru, polis baş serjantı İbrahimli Nicat Əfqan oğlu idarə etdiyi 10 XX 955 dövlət nömrə nişanlı "Toyota Prado" markalı avtomaşınla yolu keçmək istəyən piyada, 1962-ci il təvəllüdlü İdrisova Ədilə Tapdıq qızını vurub, sonuncu yolun əks tərəfində hərəkətdə olan Məmmədov Seydi Eldar oğlunun idarə etdiyi "Nissan Sentra" markalı, 90 US 078 dövlət nömrə nişanlı avtomobilin qabaq hissəsinə dəyib, nəticədə piyada Ədilə İdrisova aldığı xəsarətlərdən hadisə yerində ölüb.

Qəza nəticəsində dünyasını dəyişən Ə.İdrisova 5 nömrəli xəstəxanada tibb bacısı işləyib.

Faktla bağlı Nərimanov Rayon Prokurorluğunda Cinayət Məcəlləsinin 263.2-ci (yol hərəkəti qaydalarını pozma – ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb.