Prokuror vəkilin tutulmasını istəyir
“Ölkə.Az”ın məlumatına görə, prokuror vəkilə verilən cəzadan narazıdır. Prokurorun apellyasiya protesti Bakı Apellyasiya Məhkəməsinin hakim Əmir Bayramov tərəfindən araşdırılır.
Qeyd edək ki, yanvar ayının 29-da Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə Əfsər Talıbova hökm oxunub. Məhkəmənin hökmü ilə Ə.Talıbovun barəsində 2 il sınaq müddəti olmaqla şərti təyin edilib.
Vəkil Ə.Talıbov Cinayət Məcəlləsinin CM-nin 178.2.2, 178.2.3, 178.2.4 və 32.4, 312.2-ci maddələri ilə ittiham olunub. O, Mehman Səmədovun 22 min 900 manat pulunu dələduzluq yolu ilə ələ keçirib. İttiham aktına əsasən, Ə.Talıbov tanışı Xəyyam Hətəmova Yeni Yasamalda inşa edilən binada şəxsi mənzilinin olmasını, yalandan satmasını bildirib. O, daha sonra müştəri X.Hətəmovdan xahiş edib. X.Hətəmov ona M.Səmədovun mənzili almaq istədiyini deyib.
“Kamran” MTK-da hüquqi yardım göstərən Ə.Talıbov həmin MMC-nin təsisçisi Tofiq Babayevdən guya M.Sadıqova olan borcunun əvəzində müvəqqəti girov qoymaq adı ilə “Kamran” MMC-dən mənzil alınmasına dair müqavilə tərtib olunmasını istəyib. O, borcunu ödədikdən sonra müqaviləni geri qaytaracağını vəd edib. Lakin sonradan vəkil vədinə əməl etməyib.
Məhkəmə prosesi zamanı tərəflər arasında barışıq ərizəsi imzalanıb. Zərərçəkmiş məhkəməyə verdiyi ifadəsində Ə.Talıbova qarşı heç bir şikayəti və tələbi olmadığını deyib.
Məhkəmə istintaqı dövründə Ə.Talıbovun barəsində həbs qətimkan tədbiri seçilməyib.
Xatırladaq ki, keçmiş deputat Gülər Əhmədovanın vəkili Ə.Talıbov olub.
