Rüşvət alan arxiv müdiri hökmdən narazıdır
“Ölkə.Az”ın xəbərinə görə, Paşa Məmmədovun şikayətinə Ali Məhkəmənin hakimi Gülzar Rzayevin sədrliyi ilə baxılacaq.
Belə ki, Məmmədov Paşa Bayram oğlu Xızı rayon Dövlət Arxivinin müdiri vəzifəsində işləyərkən, Bakı şəhər sakini Əkbərov Kərimulla Ceymulla oğlundan rüşvət alıb. İttiham aktına əsasən, 2015-ci ilin oktyabr ayında Xızı rayonu Qars kəndində K.Əkbərov mərhum atası Əkbərov Ceymulla Novruz oğluna məxsus həyətyanı torpaq sahəsinə dair müvafiq sənədlərin surətlərinin verilməsi ilə bağlı etdiyi müraciətinə əsasən, xidməti səlahiyyətlərinin icrası ilə əlaqədar edəcəyi hərəkətə görə 1500 manat rüşvət istəyib, ancaq müraciət edən şəxsin imkanı olmadığından 1300 manatla razılaşıb.
Sonuncu məbləği isə 04 noyabr 2015-ci il tarixdə Xızı rayon Dövlət Arxiv idarəsinin inzibati binasındakı xidməti otağında şəxsən rüşvət kimi alıb.
Qeyd edək ki, 11 iyul 2016-cı il tarixdə Bakı Ağır Cinayətlər Məhkəməsinin hökmü ilə 9 il müddətinə azadlıqdan məhrum edilib. Sumqayıt Apellyasiya Məhkəməsi isə 1-ci instansiya məhkəməsinin hökmünü qüvvədə saxlayıb.
