"Gülya" ləqəbli dələduz qadın azadlığa çıxmaq istəyir

 Ali Məhkəmədə hakim Tahir Kazımovun sədrliyi ilə keçirilən məhkəmə prosesində 2 qadın-Məmmədova Mehriban Müseif qızı və Ağayeva İlhamə Alim qızı zərərçəkmiş qismində tanınıb. 

Qeyd edək ki, 2014-cü ilin iyun ayında mütəşəkkil dəstəyə başçılıq edən 1961-ci il təvəllüdlü "Gülya" ləqəbli Gülxanım Əhmədova Bakı Şəhər Baş Polis İdarəsi tərəfindən saxlanılıb.

Bundan öncə isə "Gülya" nın atası və qardaşı həbs olunub.

Uzun illər saxta sənədlər düzəldərək banklardan külli miqdarda kredit götürən və bunun nəticəsində banklara problem yaşadan dəstə üzvlərini sonda məsuliyyətə cəlb etmək mümkün olub. Dəstə üzvləri əvvəlcədən planlaşdırılmış şəkildə mağazalardan mebel, məişət və elektrotexnika avadanlıqlarını kreditə alıb, sonra isə ucuz qiymətə satmaqla məşğul olublar. Nəticədə kreditə götürülən avadanlıqların pulunu ödəməyiblər.

Bankların əməkdaşları bununla bağlı araşdırmalar aparıblar. Məlum olub ki, kredit götürən zaman onlar özləri saxta sənəd hazırlayaraq banklara saxta arayışlar təqdim edirlər.

Bu cür dəstələrdən birini bu yola istiqamətləndirən Əhmədova Gülxanım Pəhləvan qızı adlı vətəndaşdır. O əvvəllər də bu cür əməllərinə görə, məsuliyyətə cəlb olunaraq məhkum edilib.