Elmar Məmmədyarov: "Separatçı rejimin nümayəndəsinin Moskvaya son səfəri araşdırılacaq"

"Ölkə.Az"ın xəbərinə görə, bu sözləri Azərbaycanın xarici işlər naziri Elmar Məmmədyarov Qoşulmama Hərəkatının aralıq nazirlər konfransının yekunlarına həsr olunmuş mətbuat konfransında deyib.

Nazir separatçı rejimin nümayəndəsinin Moskvaya son səfərini də araşdıracaqlarını söyləyib: “Lazım olsa, açıqlama verəcəyik. Fransada parlament nümayəndəsi və merlə görüşmüşdülər. Fransa hökumətindən verdiyimiz notaya cavab gözləyirik. ABŞ Dövlət Departamentinin rəsmisi isə bəyan etmişdi ki, Dağlıq Qarabağı müstəqil dövlət kimi tanımırlar”.

Nazir bildirib ki, Ermənistanla münaqişə hələ də davam edir: “Bu məsələ də bəyanatda əksini tapıb. Göstərilir ki, BMT qətnamələrinə baxmayaraq, münaqişə həll olunmayıb və regional təhlükəsizliyə təhdid təşkil edir. Mən bu müddəanın sənədə daxil edilməsinə görə iştirakçılara təşəkkürümü bildirmişəm. Nazirlər əhəmiyyətli qərarlar verib. Bəyanatlardan görəcəksiniz ki, üzv ölkələr beynəlxalq sərhədlərə, ölkələrin ərazi bütövlüyünə hörmətlə yanaşır. Hərəkat ölkələrin suverenliyinə hörmət edəcək, ölkələrin daxili işinə qarışmamağa üstünlük verəcək, gücdən istifadəyə qarşı çıxacaq”.

O bildirib ki, birlik çox vacib prinsipdir, beynəlxalq qanunlar ətrafında birlik olmalıdır: “Ümumiyyətlə, bütün beynəlxalq sənədlərin məğzi eynidir, amma bütün bu prinsiplərə əməl etməliyik. Beynəlxalq səviyyədə tanınmış sərhədlər güclə dəyişdirilməməlidir”.

Venesuela Bolivar Respublikasının xarici işlər üzrə xalq hakimiyyəti naziri Xorxe Arreasa Monserrat isə hazırda “soyuq müharibə”nin yaranması üçün yeni cəhdlər göstərildiyini söyləyib: “Məhz bu səbəbdən bu gün Bakıda toplaşmışıq və biz beynəlxalq hüquq prinsiplərini qüvvədə saxlamalıyıq. Biz siyasi mövqelərimizi əlaqələndirməliyik ki, gücə malik olaq. Yalnız BMT çərçivəsində deyil, müxtəlif forumlarda güclü olaq ki, münaqişələrin və daxili işlərə müdaxilələrin qarşısını alaq. BMT Təhlükəsizlik Şurası “soyuq müharibə” dövründəki formatda fəaliyyət göstərir. BMT müzakirələr üçün unikal müstəvidir. Ancaq Təhlükəsizlik Şurasında islahatlar tələb olunur”.