“Ölkənin gələcək həyatı ilə bağlı fərqli düşüncələrim var”

Bu sözləri “Ölkə.Az”a açıqlamasında millət vəkili, prezidentliyə namizəd Zahid Oruc deyib.

Onun sözlərinə görə, elə bir şəxs uğur əldə edib ki, o, həm milli birliyi təmin edir, həm vətəndaş inamını öz üzərində saxlayır.

“Xalq hansısa bir dövlət nümayəndəsinə, məmura olan umu-küsünü, bəzən etibarını, bəzən isə kəskin mövqeyini kənara qoyub yalnız bir insanın naminə seçkiləri ümümxalq tədbiri kimi tanıdı, məntəqələrə gəldi, öz iradəsini ifadə elədi. Bu çox önəmli nəticədir. Bir çoxları düşünürdü ki, insanlar bu kampaniyaya qatılmayacaq və nəticədə bu çağırışlara tərəfdar olan qüvvələri öz adlarına çıxacaqlar. Lakin belə hal baş vermədi. Xalq seçkiləri həyata keçirdi və onun legitimliyini təmin etdi”, - deyə Zahid Oruc qeyd edib

Z. Oruc prezident seçkilərində özünün namizədliyi ilə bağlı da danışıb:

“Şübhəsiz, mənim üçün də çox böyük məsuliyyət idi ki, ulu öndər Heydər Əliyevin qurduğu Azərbaycanda ikinci dönəmdə namizədliyimi irəli sürə bilirəm və ölkəmizin keçdiyi yola, onun müstəqillik tarixinə, dövlətin quruculuq prinsiplərinə və Azərbaycanın gələcək siyasi gündəliyinə dair öz düşüncələrimi bölüşə bilirəm. Bu çox önəmli məsələ idi. Nəzərə alın ki, mən heç bir siyasi mənsubiyyət daşımırdım. Doğrudur, bitərəf olsam da, tərəfim var. Mən Heydər Əliyev ideallarına bağlı insanam. Mənim siyasi simamı bu mövqe təşkil edir. Amma ölkənin gələcək həyatı ilə bağlı çoxlu fərqli düşüncələrim var”. 

Millət vəkili xatırladıb ki, Azərbaycanda 4 milyondan artıq insan heç bir partiyaya üzv deyil. 

“Bu, mənə müəyyən bir meydan verirdi ki, mən öz mövqeyimi rahatlıqla ifadə edim, o insanlara çağırışımızı bildirim ki, hansı məsələlərdə dəyişikliklər önəmlidir, hansı təməl prinsipləri qoruyub saxlamaq lazımdır. Hər bir halda elə hesab edirəm ki, bizim mövqeyimiz Azərbaycan cəmiyyətinin müəyyən bir kəsiminin yaddaşında qaldı”, - deyə prezidentliyə namizəd bildirib.

Zahid Oruc İlham Əliyevin yenidən prezident seçiləcəyini əvvəlcədən təxmin etdiklərini vurğulayıb. 

“Xalqın iradəsinin İlham Əliyevin üzərində olduğu bizə bəlli idi və mənə elə gəlir ki, onun qələbəsi Azərbaycanı xilas edir, siyasi hakimiyyətin gələcəkdə daha böyük işlər görməsinə əlavə imkanlar yaradır. Ona görə də bir çoxları bu seçkiləri İlham Əliyevə etimad referendumu kim xarakterizə etməkdə haqlıdır. Bu səbəbdən İlham Əliyevi inamlı qələbəsi münasibətilə ürəkdən təbrik edirəm. Elə hesab edirəm ki, bu nəticələri tanıyaraq 12 apreldən başlamaqla hamının istədiyi gözəl gələcəyi birgə qurmalıyıq”.

Xatırladaq ki, Mərkəzi Seçki Komissiyası prezident seçkilərinin ilkin nəticələrini açıqlayıb. Nəticəyə görə, İlham Əliyev 86,09 faiz səslə birinci, Zahid Oruc isə 3, 07 faiz səslə 4-cü yerdə qərarlaşıb.

İlqar Əhməd

Ölkə.Az