Əl sıxmaq üstündə üç qardaşı bıçaqladı
“Ölkə.Az”ın məlumatına görə, Bakı Ağır Cinayətlər Məhkəməsində hakim Mahmud Ağalarovun sədrliyi ilə keçirilən məhkəmə iclasında prokuror ittiham aktını elan edib.
İttiham aktına görə, hadisə ötən ilin avqust ayında paytaxtın Sabunçu rayonu, Savalan qəsəbəsində qeydə alınıb.
Qəsəbə sakini 28 yaşlı Məmmədov Müseyib Yusif oğlu 39 yaşlı İbrahimov Ramin Rüstəm oğlu ilə kafedə mübahisə edib. Mübahisəyə səbəb isə M.Məmmədovun R.İbrahimovun əlini sıxması olub. Belə ki, Ramin Müseyibdən əlini niyə sıxdığını soruşub. Müseyib isə “kişinin əlini sıxarlar” cavabını verib. Bundan sonra tərəflər arasında mübahisə dava ilə nəticələnib.
Nəticədə R.İbrahimov M.Məmmədov tərəfindən qarın boşluğundan çoxsaylı bıçaq xəsarətləri alıb. Qardaşlarının qan içində olduğunu görən 37 yaşlı İbrahimov Ruslan Rüstəm oğlu və 18 yaşlı İbrahimov Rəhman Rüstəm oğlu hadisəni törədən şəxslə əlbəyaxa olublar. Ancaq əli bıçaqlı şəxs qardaşlara da xəsarət yetirib.
Bıçaqlanan qardaşların üçü də 3 saylı şəhər xəstəxanasına yerləşdiriliblər. Onlardan Ruslan və Ramin İbrahimovların vəziyyəti ağır olduğu üçün reanimasiya şöbəsinə yerləşdiriliblər. İbrahimov Rəhman Rüstəm oğlu isə ambulator müalicəyə buraxılıb.
Faktla bağlı Sabunçu Rayon Polis İdarəsində cinayət məcəlləsinin 126.2.4. (Qəsdən sağlamlığa ağır zərər vurma, yəni insan həyatı üçün təhlükəli olan cinayət iki və ya daha çox şəxsə qarşı törədilmə) maddəsi ilə cinayət işi başlanılıb. Hadisəni törədən 28 yaşlı Məmmədov Müseyib Yusif oğlu isə Sabunçu rayon Polis İdarəsinin 14-cü polis bölməsinin əməkdaşları tərəfindən saxlanılaraq istintaq şöbəsinə təhvil verilib.
