Gömrük generalının evindən oğurluq edən qadının məhkəməsi

“Ölkə.Az”ın məlumatına görə, dövlət ittihamçısı bəraət hökmündən narazı qaldığına görə apellyasiya protesti verib. Bu gün Bakı Apellyasiya Məhkəməsinin hakimi Əflatun Qasımovun sədrliyi ilə prokurorun protesti müzakirə olunacaq.

Xatırladaq ki, generalın evindən baş verən oğurluq hadisəsi 2015-ci ildə qeydə alınıb. Dövlət Gömrük Komitəsinin generalı Qambay Əliyevin evindən çemodandakı qızılları oğurlamaqda təqsirləndirilən şəxs həmin villada qulluqçu işləmiş Sədaqət Məmmədovadır. 2015-ci ildə hadisədən bir neçə gün sonra şübhəli şəxs qismində saxlanılan S.Məmmədova barəsində 4 aylıq həbs qəti-imkan tədbiri seçilib və sonradan ev dustaqlığına buraxılıb. Çünki onun törətdiyi deyilən oğurluq əməlini sübut edən kifayət qədər faktlar yox idi.

Cinayət Məcəlləsinin 177-ci (oğurluq) maddəsi ilə təqsirli bilinən S.Məmmədovanın cinayət işi üzrə məhkəmə prosesi ötən ilin oktyabr ayında sona çatıb.

Məhkəmənin hökmü ilə S.Məmmədovun ittiham olunduğu Cinayət Məcəlləsinin 177-ci (oğurluq) maddəsinə bəraət hökmü çıxarılıb. Hökmə əsasən, 326.1-ci və 326.2-ci (rəsmi sənədləri zədələmə və gizlətmə) maddələrin isə müddəti keçdiyi üçün S.Məmmədovaya cəza təyin edilməyib.

Dövlət ittihamçısı isə çıxışında S.Məmmədovanın 9 il müddətinə azadlıqdan məhrum edilməsini istəyib.

Oğurluq hadisəsi general Qambay Əliyevin anası Böyükxanım Əkbərovanın adına olan Nəsimi rayonu, İzzət Həmidov küçəsi ev 7, mənzil 8-də baş verib. General da anasının adına olan bu villada yaşayır.

Qeyd edək ki, generalın anası oğurluq hadisəsindən bir neçə ay sonra dünyasını dəyişib. Mərhuma məxsus mənzildən ümumi dəyəri 160 min manata yaxın qızıl-zinət oğurlandığı qeyd edilir. Oğurlanan qızıl-zinət əşyalarının mərhuma məxsus olduğu bildirirlir.

Sədaqət Məmmədova oğurluq hadisəsində generalın kürəkəni Ramin Qədirovdan şübhələnib. S.Məmmədova məhkəmə prosesində də bunları dilə gətirib. O, əsas olaraq isə göstərir ki, oğurluq hadisəsindən əvvəl Ramin Qədirov Böyükxanım Əkbərovadan 200 min pul istəyib. Generalın anası isə Ramin Qədirova 4 min manat verib. Həmçinin Ramin Qədirov arvadının ondan xəbərsiz ev aldığından xəbər tutub və intiqam almaq istəyib.
S.Məmmədova həbsdən azad edildikdən sonra mətbuata açıqlamasında deyib ki, generalın adını bu işdə hallandırmamağa çalışırlar. Onun iddiasına görə, oğurlanan qızıllar generalın olsa da, anasının adı çəkilir.

Bildirək ki, bu işdə zərərçəkmiş tərəfin vəkilləri generalın və ailə üzvlərinin adının hallanmaması üçün çalışırlar.

Qeyd edək ki, bu iş üzrə şahid qismində generalın kürəklənləri və qızları da məhkəmədə şahid qismində ifadə verib. Ancaq generalın qızları dindirilərkən məhkəmə prosesi qapalı keçirilib. Məhkəmənin qapalı keçirilməsi ilə bağlı təklifi isə zərərçəkmiş tərəf irəli sürüb.