Əliağa Hüseynov: “Mitinq keçirtmək istəyən müxalifət uduzacaqlarını anladığı üçün seçkilərə qatılmayıb”

Bu fikirləri “Ölkə.Az”a açıqlamasında Milli Məclisin deputatı, ehtiyyatda olan general-leytenant Əliağa Hüseynov bildirib.

Ə.Hüseynov deyib ki, prezident İlham Əliyevin qələbə qazanması gözlənilən idi:

“Mən cənab prezidenti seçkilərdə qazandığı qələbə münasibətilə təbrik edirəm. Allah xalqımız və dövlətimiz üçün xeyrli etsin. İnşallah cənab prezident ölkəmizə bundan da böyük qələbələr qazandırsın”.

Ehtiyyatda olan general müxalifətin aprelin 14-ə təyin etdiyi mitinqə də münasibət bildirib:

“Axı onlar nə üçün və nəyə etiraz mitinqi keçirtmək istəyirlər? Məgər onlar seçkilərdə prezident İlham Əliyevə rəqib olublar? Mitinqi seçkilərdə uduzan siyasi partiya rəhbərləri etsəydilər, bunu anlamaq olardı. Bəlkə kimsə onların səsini oğurlayıb və bunlar da nə isə etiraz etmək istəyir və sairə. Amma mitinq keçirtmək istəyən müxalifət uduzacaqlarını anladığı üçün seçkilərə qatılmayıb. Əgər seçkilərdə iştirak etmiş və uduzmuş namizədlərdən heç birinin səsi çıxmırsa, o zaman seçkilərə qatılmayan adamlar nəyə etiraz edirlər? Artıq dünya ölkələrinin prezidentləri də cənab İlham Əliyevi qazandığı qələbə münasibətilə təbrik edir. İndi biz 5-10 nəfərə, Azərbaycan xalqının seçiminə inanmalıyıq? Mən müxalifətə Allahdan ağıl arzu edirəm ki, haqqı nahaqdan ayıra bilsinlər”.

Vasif Həsənli
Ölkə.Az