Bir ailənin faciəsinə səbəb olan sürücünün məhkəməsi
“Ölkə.Az”ın xəbərinə görə, cinayət məcəlləsinin 263-1.4-cü maddəsi ilə təqsirli bilinən T.Qədirovun məhkəmə prosesinə hakim Ramella Allahverdiyeva sədrlik edəcək.
Xatırladaq ki, ağır qəza 2017-ci il noyabrın 23-də səhər saat 7 radələrində baş verib. Sabunçu rayonu Zabrat qəsəbəsi ərazisində yolu keçən paytaxt sakinləri Azər Əhmədov, həyat yoldaşı Olqa və iki azyaşlı övladı “VAZ 2107” markalı avtomobillə vurulub. Belə ki, qəzada yaralanan Azər Əhmədov 4 gün süni nəfəs aparatına qoşulu saxlansa da, onun və 6 yaşlı qızı Mədinənin həyatını xilas etmək mümkün olmayıb. Qəzada yaralanan ailənin digər üzvləri Olqa Əhmədova və oğlu Malikin isə həyatını xilas etmək mümkün olub.
Daxili İşlər Nazirliyinin mətbuat xidmətindən verilən məlumata görə, qəzanı törədən sürücü piyadalara heç bir yardım göstərmədən hadisə yerindən qaçıb.
Qəza barədə Sabunçu Rayon Polis İdarəsinə (RPİ) məlumat daxil olan kimi istintaq-əməliyyat qrupu hadisə yerinə çıxıb, müvafiq müayinələr aparılıb. Həyata keçirilən əməliyyat-axtarış tədbirləri nəticəsində hadisənin “VAZ 2107” markalı avtomobillə törədildiyi müəyyən edilib və dərhal görülmüş tədbirlərlə Sabunçu rayonunun Kürdəxanı qəsəbə sakini, əvvəllər məhkum olunmuş Tofiq Qədirov şübhəli şəxs qismində saxlanılaraq istintaqa təqdim olunub. Onun “VAZ 2107” markalı nəqliyyat vasitəsi evinin həyətindən aşkar edilərək müvəqqəti mühafizə olunan duracağa yerləşdirilib.
