Bəraət alan ər-arvad yenidən hakim qarşısında

“Ölkə.Az”ın məlumatına görə, bəraət alan ər-arvaddan zərərçəkmiş qismində tanınan Mahmudova Aytən Zaur qızı Şəki Apellyasiya Məhkəməsinə şikayət edib. Bu gün keçirilən məhkəmə prosesinə hakim Mirbahəddin Hüseynov sədrlik edəcək. 

Xatırladaq ki, 2018-ci il mart ayının 7-də Şəkidə iş adamına qarşı dələduzluq etməkdə təqsirli bilinən Rahim Məmmədov və onun həyat yoldaşı Aynur Məmmədovanın cinayət işi üzrə məhkəmə prosesi başa çatıb.

Şəki Ağır Cinayətlər Məhkəməsində hakim Xəqani Səmədovun sədrliyi ilə baş tutan prosesdə təqsirləndirilən şəxslərə hökm oxunub.

Məhkəmə istintaqı zamanı Rahim Məmmədov və Aynur Məmmədovanın əməli sübuta yetirilməyib və onların barəsində bəraətverici hökm çıxarılıb.

İstintaq orqanını gəldiyi nəticəyə görə, Rahim Məmmədov və onun həyat yoldaşı Aynur Məmmədova Şəki şəhərində bizneslə məşğul olan Aytən Mahmudovaya qarşı dələduzluq ediblər. İstintaq orqanı onların barəsində Cinayət Məcəlləsinin 178.3.2-ci (külli miqdarda dələduzluq törətmək) maddəsi ilə ittiham elan edib. 

Qeyd edək ki, 2015-ci ilin noyabr ayında zərərçəkən hətta bu məsələyə görə intiharda edib. Belə ki, Şəki şəhəri F.X.Xoyski küçəsi, ev 7 ünvanında yaşayan iş adamı Aytən Mahmudova bildirib ki, onun heç kimə borcu olmayıb: “Mənim intihar etməyimə səbəb rəfiqəmin mənə olan borcunu qaytarmamasıdır. Neçə illərdir dostluq etdiyim Aynur Məmmədova ilə əri Rahim Məmmədov birlikdə mənə qarşı dələduzluq ediblər. Mən onlara etibar edib satmaq üçün təxminən 40 min dollarlıq dəyəri olan qızıl-zinət əşyları verdim. Bir ilə yaxın vaxt keçib, amma nə pulu qaytarırlar, nə də ortada qızıl var. Mən də daha dözə bilmədim, özümü öldürmək istədim. Həkimlərin sayəsində sağ qaldım”.