Mübariz Qurbanlı: "Din xadimlərinə maliyyə dəstəyi veriləcək"

"Ölkə.Az"ın məlumatına görə, bunu jurnalistlərə açıqlmasında Yeni Azərbaycan Partiyasının (YAP) icra katibinin müavini, Dini Qurumlarla İş üzrə Dövlət Komitəsinin sədri səlahiyyətlərini icra edən Mübariz Qurbanlı  bildirib. 

M.Qurbanlı deyib ki, Azərbaycanın milli mənəvi dəyərləri içərisində onun dini, dili, müstəqilliyi, xalqımızın adət-ənənləri ön sırada dayanır:
"Biz bunları hifz etməliyik. Baxmayaraq ki, dünyada qloballaşma prosesi gedir. Bəzən bu qloballaşma prosesi çərçivəsində baş verən mədəniyyətlərin qovuşması prosesində milli-mənəvi dəyərlərin bu və ya digər formada aradan qalxması gözlənilir. Bu prosesin qarşısını almaq, mənəvi dəyərləri qorumaq bizim üçün çox vacibdir".  

M.Qurbanlı qeyd edib ki, dövlətdən maddi dəstək alacaq din xadimlərinin siyahısı Mənəvi Dəyərlərin Təbliği Fonduna təqdim edilib:

"Hazırda fond bu məsələ üzərində işləyir. Siyahı dəqiqləşdirilir, fondla Qafqaz Müsəlmanları İdarəsi bu istiqamətdə fəaliyyət göstərir. Himayəçilər Şurası da bu məsələni müzakirə edib. Yaxın vaxtlarda həmin maddi dəstəklər məscidlərdə çalışan din xadimlərinə veriləcək. Fondun vəsaiti yalnız dövlətdən deyil, həm də müxtəlif növ ianələrdən də əldə olunacaq. Dəstək din xadiminin tutduğu vəzifəyə görə fərqli olacaq. Daha çox əmək haqqını imam alacaq. Naxçıvan Muxtar Respublikasında çalışan din xadimlərinə də fonddan maddi dəstək veriləcək".

Vasif Həsənli
Ölkə.Az