Azərbaycanda 3 ayda 7 ana ölümü qeydə alınıb

"Ölkə.Az" xəbər verir ki, bunu jurnalistlərə açıqlamasında Doğuşayardım Komissiyasının sədri, Səhiyyə Nazirliyinin baş mama-ginekoloqu Sevinc Məmmədova deyib.

O bildirib ki, son iki ilin müvafiq dövrü ilə müqayisədə bu rəqəm yüksək deyil: "Ölümlərin əsas səbəbləri baş beyində qan sızması, ürək xəstəliyi, böyrək və qaraciyər çatışmazlığı, endokrinoloji patologiyası olan piylənmə və başqa amillərlə bağlı olub".

Nazirlik rəsmisi qeyd edib ki, bu il baş verən ana ölümləri ilə bağlı 12 tibb işçisinə töhmət verilib, hətta həbs olunan da var: "Keçən il ümumilikdə 20 ana ölümü olub. Buna görə 50-dən artıq tibb işçisi inzibati tənbeh tədbirlərinə cəlb olunub. Burada həm dövlət, həm də özəl tibb müəssisələri var". 

Bundan əlavə Sevinc Məmmədova bildirib ki, keçən il ölkə üzrə 37 618 qadın abort etdirib.

Onun sözlərinə görə, onlar, əsasən, 18-25 yaş arası qadınlar olub: "Abortdan sonra ölkə üzrə heç bir fəsadlaşma baş verməyib, yəni ölüm halı qeydə alınmayıb. Abortlar rəsmi olaraq stasionarda qeydiyyata alınıb".

S.Məmmədova qeyd edib ki, nadir hallarda 18 yaşına çatmayan qadınlarda abort faktı olub: "Bunun da sayı keçən il çox az, təxminən, 5-ə yaxın olub".