Sevgilisinə görə həbsxanaya düşən qadının acı hekayəsi

31 yaşlı Gədəbəy rayon sakini olan qadın sevgilisinin dostunu bıçaqladığına görə məhkəmə qarşısına çıxarılacaq.

“Ölkə.Az”ın xəbərinə görə, cinayət məcəlləsinin 126.1-ci maddəsi ilə təqsirli bilinən Musayeva Ulduz Firdovsi qızının məhkəmə prosesi Gəncə Ağır Cinayətlər Məhkəməsinə keçiriləcək. Cinayət işində zərərçəkmiş qismində Sahib Rüstəmov tanınıb.

Qanlı hadisə 2017-ci ilin sentyabr ayında Gədəbəy rayonunun mərkəzində qeydə alınıb. Arıqdam kənd sakini 30 yaşlı Ulduz Musayeva mübahisə zəmnində Çalburun kəndindən olan 25 yaşlı Sahib Rüstəmova xəsarət yetirib.

Əvvəlcə Gədəbəy Rayon Mərkəzi Xəstəxanasına ilkin tibbi yardım göstərilən gənc daha sonra Gəncə şəhər Təcili Tibbi Yardım Xəstəxanasına gətirilib. Yaralıya qarının daxilə nüfuz edən kəsilmiş deşilmiş yara diaqnozu qoyulub.

Mübahisə zamanı ayağından xəsarət alan qadının müalicəsi isə Gədəbəydə davam etdirilib.

İttiham aktına görə, Ulduz Musayeva hadisəyə səbəb kimi qeyri-rəsmi nigahda olduğu Kamil adlı şəxsin onu atmasını göstərib. Və sevdiyi şəxsin bu addımını qəbul etməyərək onu öldürmək qərarına gəlib. Küçədə mübahisə edən tərəfləri sakitləşdirmək istəyi isə Sahib Rüstəmova baha başa gəlib.
Təqsirləndirilən şəxs ifadəsində bildirib:

“Dedi səninlə qurtardım. Məndə arxasınca gəldim. Zəng edəndə dedi ki, restorandayam. Mənə acıq verdi yanımda kimlər var nə bilim belə elə. Məndə gəldim orada çəkişdim. Bıçağı əlimdən almaq istədi. Məndə qollarını əlini dişlədim ki, buraxsın vurum. Ona kimi bu yetim araya girdi bıçaqda buna girdi”.
Sevginin cinayətkara çevirdiyi qadının əməli ilə bağlı Gədəbəy Rayon Polis Şöbəsində qəsdən sağlamlığa ağır xəsarət yetirmə maddəsi ilə cinayət işi başlanıb.