Yanacaqdoldurma məntəqəsinə hücum edən maskalı şəxslərin məhkəməsi
“Ölkə.Az”ın xəbərinə görə, cinayət məcəlləsinin quldurluq maddəsi ilə təqsirləndirilən- Mənəfli Tacı Musa oğlu, Rəsulov Roman Vacib oğlu və Məmmədov Azad Şaban oğlununun məhkəmə prosesinə hakim Camal Ramazanov sədrlik edib. Hazırlıq iclasında saxlanılan şəxslərin anket məlumatları dəqiqləşdirilib.
Xatırladaq ki, 2018-ci ilin yanvar ayında Şəki ŞRPŞ-nin keçirdiyi əməliyyat tədbirləri ilə Şəkidə yanacaqdoldurma məntəqəsinə hücum edən maskalı şəxslər saxlanılıb. Hadisəni törətməkdə şübhəli bilinən Kiçik Dəhnə kənd sakinləri, 27 yaşlı Rəsulov Roman Vacib oğlu və 25 yaşlı Mənəfli Tacı Musa oğlu saxlanılaraq polis orqanına gətirilib və öz ifadələrində hər iki şəxs əməllərini etiraf edib. Sonra isə dəstənin 3-cü şəxsi- Azad Məmmədovda saxlanılıb.
Müəyyən edilib ki, Roman Rəsulovla Tacı Mənəfli rayonun Kiçik Dəhnə kəndi ərazisində fəaliyyət göstərən “Dəhnə Petrol” YDM-ə gəlib, yardımçı otağın pəncərə şüşəsini sındıraraq içəri daxil olub və orada işləyən operatorları bıçaq və taxta parçası ilə hədələyərək pul vermələrini tələb edib.
Saxlanıldıqdan sonra polis əməkdaşları tərəfindən onlara məxsus “VAZ 2107” markalı avtomobilə baxış keçirilib və oradan 2 ədəd idman papağından hazırlanmış maska, 1 ədəd bıçaq, 1 ədəd yapışqanlı lent, 1 ədəd idman şalvarı və gödəkcə aşkar edilib.
