“Turist daşınması ilə məşğul olan nəqliyyat vasitələri akkreditasiyadan keçirilməlidir”

Bu fikirləri “Ölkə.Az”a açıqlamasında Azərbaycan Respublikası Sahibkarlar Təşkilatları Milli Konfederasiyasının Turizm komissiyasının sədri, Qlobal Sağlamlıq Turizmi Təşkilatının prezidenti, turizm eksperti Ruslan Quliyev bildirib. 

R.Quliyev deyib ki, hazırda bu sahədə Azərbaycan qanunvericiliyində bir sıra boşluqlar mövcuddur:

“Bunlardan biri də istənilən adamın nəqliyyat vasitəsi alıb turist daşınması ilə məşğul olmasıdır. Dünya təcrübəsində də var ki, hər nəqliyyat vasitəsi olan şəxs və ya şirkət turist daşıya bilməz. Bu, taksi sürücülərinə də şamil edilir. Misal üçün, qardaş Türkiyənin Antalya bölgəsində  başqa regionun sürücüsü gəlib taksi fəaliyyəti ilə məşğul ola bilməz. Antalyada qayda belədir ki, başqa bölgənin taksi sürücüsü digər şəhərə gedən zaman orada mütləq öz növbəsini gözləməlidir. Yəni, qanunla bu tənzimlənir”. 

Bakıda “London taksiləri” kimi tanınan taksi sürücülərinin xarici turistlərə qarşı yol verdikləri dələduzluq hərəkətlərini pisləyən R.Quliyev bu cür halların Azərbaycan dövlətinin imicinə xələl gətirdiyini söyləyib:

“Bu cür hallar ölkəmizin adına da mənfi imic yaradır və gələcəkdə Azərbaycan haqqında ümumi neqativ fikirlər formalaşdırır. Hesab edirəm ki, Azərbaycan Turizm Şurasında təmsil olunan 17 qurum, o cümlədən Nəqliyyat, Rabitə və Yüksək Texnologiyalar Nazirliyi sözügedən problemlərin aradan qaldırılması üçün müvafiq addımlar atmalıdır, bu sahədə maarifləndirici tədbirlər həyata keçirilməlidir. Təkcə “London taksiləri”ndə deyil, bütövlükdə bu sahədə xeyli problemlər mövcuddur ki, onlar nəzarətdən kənarda qalıb. Sağ olsun, cənab prezident bu sahədə islahatların həyata keçirilməsi üçün müvafiq tapşırıqlarını verib. Ona görə bu istiqamətdə konkret işlər görülməlidir”.

Vasif Həsənli
Ölkə.Az