Azərbaycanlı qadın Tatarıstanda nazir təyin edildi

“Ölkə.Az” xəbər verir ki, İradə Əyyubova bu günə qədər arxiv işləri üzrə dövlət komitəsi sədri vəzifəsini icra edib.

Azərbaycanlı xanımın nazir təyin edilməsi barədə sərəncam Tatarıstan Respublikasının rəsmi internet səhifəsində yerləşdirilib.

“Əyyubova İradə Hafiz qızı mədəniyyət naziri təyin edilsin. Əvvəlki vəzifədən azad edilsin”, - deyə sərəncamda bildirilir.

İradə Əyyubova 1971-ci ilin 13 iyul tarixində Bakıda doğulub. 1993-cü ildə Azərbaycan dövlət Neft-Kimya institutunu bitirib. İxtisasca riyaziyyatçı-mühəndisdir. 2002-ci ildə isə Tatarıstanda ali məktəbi hüquqşünas ixtisası üzrə bitirib.

1994-cü ildən bir sıra vəzifələrdədir.  2005-2006-cı illərdə Kazan sahibkarlarına dəstək Komitəsinin sədri, 2008-2011-ci illərdə mədəniyyət nazirinin müavini, 2011-2015-ci illərdə eyni nazirlikdə birinci müavin çalışıb.

2016-cı ildən arxiv işləri üzrə dövlət komitəsinin sədridir. Tatarıstan respublikasının əməkdar iqtisadçısıdır.

Hikmət Həsənov
Ölkə.Az