Sərxoş vəziyyətdə qəza törətdi, əmisioğlu öldü
Ötən gün Binəqədi rayonunda Mərkəzi küçədə ölümlə nəticələnən qəza baş verib.
“Ölkə.Az”ın xəbərinə görə, Bəxtiyar Rəsulov “Mitsubishi Pajero” markalı avtomobili sərxoş vəziyyətdə idarə edən zaman qəza törədib. Nəticədə avtomobildə olan sərnişini-əmisioğlu Firudin Rəsulov ağır bədən xəsarətləri ilə xəstəxanaya çatdırılsa da, onun həyatını xilas etmək mümkün olmayıb.
Baş vermiş hadisə ilə bağlı qəza yerinə Binəqədi RPİ-nin əməkdaşları gəlib və araşdırmalara başlayıblar. Sürücü qəzanı sərxoş vəziyyətdə törətdiyinə görə barəsində həbs qətimkan tədbiri seçilib, avtomobil isə cərimə meydançasına aparılıb.
Faktla bağlı Binəqədi RPİ-nin İstintaq Şöbəsində cinayət məcəlləsinin 263-cü maddəsi ilə cinayət işi başlanıb, avtotexniki ekspertiza təyin edilib.
