“Ərdoğanla 99 faiz oxşarıq”

Bu fikirləri “Ölkə.Az”a açıqlamasında Azərbaycan Milli Dövlətçilik Partiyasının sədri, 1988-ci ildə başlanan Azərbaycan Milli Azadlıq Hərəkatının liderlərindən biri Nemət Pənahlı bildirib. 

N.Pənahlı deyib ki, onu daha çox Ərdoğana bənzədirlər:

“Bəli, mən də bu bənzətməni qəbul edirəm. Yəni, Rəcəb Tayyib Ərdoğanla mənim həyata baxışımda, dünya görüşümdə, prinsiplərimdə 99 faiz oxşarlıq var. Hətta, bəzən deyirlər ki, Ərdoğanın əvvəldən dediyi elə şeir yoxdur ki, onu mən bilməyim. Mənim dediyim şeirlərin əksəriyyətini Ərdoğan da bilir. Dünya görüşü baxımından Ərdoğanla çox yaxınıq. Onunla mənim siyasi görüşüm, dünyaya və həyata baxışım və inancım uyğun gəlir. Rəcəb Tayyib Ərdoğan yeganə siyasətçidir ki, onunla özüm arasında çoxlu ortaq nöqtələr var”.

N.Pənahlı onun Nikol Paşinyanla müqayisə edilməsinə də etirazını bildirib:

“Paşinyanla mənim heç bir oxşar cəhətim yoxdur. Bizim apardığımız mübarizə də tamam fərqlidir. Əgər mənim 1988-1989-cu illərdəki mübarizəmi nəzərdə tuturlarsa, ilk növbədə cəhalətdir ki, milli azadlıq uğrunda hərəkatla hakimiyyət uğrunda mübarizəni eyniləşdirəsən. Bizim 1988-1990-cı illərdə apardığımız mübarizə milli istiqlal savaşı olub. Ona görə də mənimlə Nikol Paşinyan heç bir ortaq nöqtəsi yoxdur və ola da bilməz”.

Vasif Həsənli
Ölkə.Az