Cehiz almaq adı ilə mebel dükanlarını aldadan dələduzun məhkəmə işi

Binəqədi Rayon Məhkəməsində toy etmək adı ilə cehizlik mebel götürərək dələduzluq edən şəxsin məhkəməsi başlayıb.

“Ölkə.Az”ın xəbərinə görə, cinayət məcəlləsinin 178.2.1-ci (dələduzluq) maddəsi ilə təqsirli bilinən Xəlilov Tural Tofiq oğlunun növbəti məhkəmə prosesi may ayının 21-də hakim Mirheydər Zeynalovun sədrliyi ilə keçiriləcək. Cinayət işində 17 nəfər zərərçəkən qismində tanınıb.

İttiham aktına görə, Tural Xəlilov ötən ilin ortalarından başlayaraq Bakı və Sumqayıt şəhərlərində mebel mağazalarına yaxınlaşaraq toy edəcəklərini və dükandan mebel götürmək istədiklərini bildirib. Bu işdə ona 1 qız və 1 kişi köməklik göstərib. Özünü bəy kimi təqdim edən Tural yanındakı qızı gələcək həyat yoldaşı , kişini isə qayınatası kimi təqdim edib və belə mağaza sahiblərini inandıra bilib. Aldıqları mebellərin pulunu toydan sonra yığılacaq pulla ödəyəcəklərini deyərək satıcıları inandırmağı bacarıblar. Vədlərini əməl etməyən şəxslər Nəsimi rayonunda yerləşən mebel mağazasının sahibi Elvin Həmidova 7 min manat dəyərində ziyan vurublar.

Zərərçəkən Elvin Həmidov istintaqa verdiyi ifadə də bildirib ki, gələnlər qızına cehiz verəcəyini söyləyərək onu aldadıblar:

“Biz də güvəndik, mebelləri verdik. 1 aydır zəng etmişik. Deyir ki, verəcəyik. Biz də mənzilə müraciət etmişik. Evə yaxınlaşmışıq. Qapının cəftəsinin qırıq olduğunu görmüşük. Komendanta müraciət etmişik. O da deyib ki, nəinki siz, çox adam bununla bağlı müraciət edir”.

Mebel dələduzları Sumqayıt şəhərində yerləşən obyektdən də 3600 dəyərində mebel götürüblər. Dükan sahibinə isə 200 manat beh veriblər.
Digər zərərçəkən isə mebeli göndərib, sonradan bəlli olub ki, fırıldaqçılar Sumqayıtda bir neçə mağazaya yaxınlaşıblar.