"Reuters": Müharibə Qırmızı dənizə və Xəzərə yayılır, yeni cəbhələr açılır

ABŞ ordusu şənbə günü İrana qarşı tətbiq etdiyi dəniz blokadasının tam qüvvədə qaldığını açıqlayıb. Bununla yanaşı, son 13 gecə ardıcıl davam edən və getdikcə intensivləşən hava zərbələrinin niyə dayandırıldığı barədə məlumat verilməyib.

Həftəsonu ərzində İranın qonşu ölkələrə qarşı yeni hücumlar həyata keçirdiyinə dair məlumat yayılmayıb.

ABŞ Prezidenti Donald Tramp administrasiyasının yüksəkvəzifəli nümayəndəsi bildirib ki, Tramp həmişə diplomatiyaya üstünlük verdiyini açıq şəkildə bəyan edib, lakin İran ciddi danışıqlara gəlmədiyi təqdirdə onu nələrin gözlədiyini də nümayiş etdirib.

"The New York Times" qəzetinin məlumatına görə, Donald Tramp hələlik İrana qarşı hücumların genişləndirilməsi planlarını təxirə salıb. Nəşrin yazdığına görə, bu qərar məsələ ilə tanış olan iki mənbənin verdiyi məlumata əsaslanır.

Qəzetin məlumatına əsasən, Tramp və müşavirləri münaqişənin genişlənməsi, müdafiə sursatı ehtiyatlarının azalması, Yaxın Şərqdəki Körfəz müttəfiqlərinin narazılığı, enerji təchizatına və qlobal iqtisadiyyata mümkün təsirlərdən narahatdırlar.

CNN telekanalının ABŞ rəsmisinə istinadən yaydığı məlumata görə, vitse-prezident Cey Di Vens və ABŞ Silahlı Qüvvələrinin Birləşmiş Qərargah Rəisləri Komitəsinin sədri general Den Keyn cümə günü Ağ evdə keçirilən görüşdə sursat ehtiyatlarının azalması ilə bağlı narahatlıqlarını Trampa çatdırıblar.

ABŞ Müdafiə Nazirliyindəki mənbə isə CNN-ə bildirib ki, hərbi əməliyyatlar hazırda dayandırılıb.

Qırmızı dənizdə gərginlik artır

Körfəz bölgəsində nisbi sakitlik müşahidə olunsa da, husilərlə Səudiyyə Ərəbistanı arasında baş verən son qarşıdurma göstərir ki, Hörmüz boğazından enerji daşımalarına təsir edən müharibə ikinci mühüm dəniz nəqliyyatı marşrutunu da təhlükə altına qoya, həmçinin Yəməndə vətəndaş müharibəsini yenidən alovlandıra bilər.

İran Xarici İşlər Nazirliyi ayrıca bəyan edib ki, Ukrayna Xəzər dənizində İranın ticarət gəmisinə hücum edib. Nazirliyin məlumatına görə, hadisə nəticəsində bir dənizçi həlak olub, digəri isə yaralanıb.

İranın dövlət xəbər agentliyi "IRNA”nın məlumatına görə, Tehran hadisəni "düşmənçilik və cinayət xarakterli hücum" adlandıraraq Ukraynanın Tehrandakı müvəqqəti işlər vəkilini Xarici İşlər Nazirliyinə çağırıb.

Bu bəyanat Ukrayna Prezidenti Volodimir Zelenskinin Rusiyanın Yaxın Şərqdə əldə etdiyi peyk müşahidə məlumatlarını İrana ötürdüyünü və bunun bölgədə zərbələrin koordinasiyasına kömək etdiyini bildirməsi ilə eyni vaxta təsadüf edib.

Husilər Səudiyyə Ərəbistanının neft obyektlərini hədəfə aldı

Husilərin hərbi sözçüsü Yəhya Səri qruplaşmanın şənbə günü "Aramco” şirkətinə məxsus Cizan və Yanbu şəhərlərindəki obyektlərə zərbələr endirdiyini açıqlayıb.

Reuters tərəfindən təsdiqlənmiş sosial şəbəkə görüntülərində Yəmən sərhədi yaxınlığındakı Cizan şəhərində yerləşən "Aramco” neft emalı zavodu istiqamətindən qalın tüstünün qalxdığı görünür. Zavodun gündəlik emal gücü 400 min barel xam neft təşkil edir.

Asiyada fəaliyyət göstərən iki ticarət mənbəsi Cizandakı yanacaq və neft anbarlarına ziyan dəyə biləcəyi barədə məlumat aldıqlarını bildirib. "Aramco” məsələ ilə bağlı sorğulara cavab verməyib.

Yanbu şəhərində isə neft obyektlərinə yönəlmiş iki raketin hava hücumundan müdafiə sistemləri tərəfindən zərərsizləşdirildiyi bildirilib. Yanbu Səudiyyə Ərəbistanının Qırmızı dənizdə yerləşən əsas neft limanı hesab olunur və İranın blokadaya aldığı Hörmüz boğazından yan keçən mühüm ixrac marşrutudur.

Yəməndə döyüşlər yenidən alovlanır

Yəmən rəsmilərinin sözlərinə görə, Səudiyyə Ərəbistanının dəstəklədiyi, beynəlxalq səviyyədə tanınan hökumətin hərbi hava qüvvələri husilərin Mərib və əl-Cövf əyalətlərindəki mövqelərinə zərbələr endirib.

Mənbələrin bildirdiyinə görə, Yəməndə vətəndaş müharibəsinin hər iki tərəfi cəbhə xətti boyunca qüvvələrini səfərbər edir.

Səudiyyə Ərəbistanı husilərin paytaxt Sənanı ələ keçirməsindən sonra onlara qarşı döyüşən ərəb koalisiyasına rəhbərlik edir.

Yüz minlərlə insanın həyatına son qoyan və aclığa səbəb olan Yəmən vətəndaş müharibəsi 2022-ci ildən qüvvədə olan atəşkəslə dayandırılmışdı.

Lakin bu ay atəşkəs faktiki olaraq pozulub. Husilər beş ay əvvəl ABŞ və İsrailin hücumlarından sonra İranın başladığı daha genişmiqyaslı münaqişəyə qoşulublar.

Husilər son bir həftə ərzində Səudiyyə Ərəbistanına qarşı dəniz blokadası elan ediblər. Qruplaşmanın lideri Əbdül Malik əl-Husi bildirib ki, Səudiyyə Ərəbistanının bütün neft obyektləri potensial hədəf hesab olunur.(qaynarinfo)