Orban: Avropa İttifaqı 25 ildən sonra yox ola bilər
Orbanın sözlərinə görə, Avropa İttifaqı indiki vəziyyətində davamlı deyil. O bildirib ki, bir sıra digər beynəlxalq təşkilatlar kimi, Aİ də yaxın illərdə özünü yeniləyə bilməsə, ya tamamilə yox ola, ya da tanınmaz dərəcədə dəyişə bilər.
"Uyğunlaşa bilməyən yox olacaq. Mənim gördüyüm qədərilə Avropa İttifaqı hazırda uyğunlaşmaq qabiliyyətinə malik deyil. Mən onun yox olmasını istəmirəm. Əksinə, istəyirəm ki, o, dəyişə bilsin və Macarıstan da bu prosesdə öz rolunu oynasın. Nəticədə biz qalib tərəf olaq. Lakin bu gün dürüst danışsaq, görünür ki, Avropa İttifaqı özünü islahat yolu ilə yeniləyə bilmir. Buna görə də onun böyük gələcəyini proqnozlaşdırmıram", deyə Orban bildirib.
Çıxış zamanı ondan Avropa Komissiyasının sədri vəzifəsini qəbul edib-etməyəcəyi soruşulduqda, Orban bu vəzifənin ümumiyyətlə ləğv edilməli olduğunu deyib.
Onun fikrincə, Avropa İttifaqında islahatlar aparılmalı, Avropa Komissiyasının geniş səlahiyyətləri məhdudlaşdırılmalıdır. Orban hesab edir ki, bu yalnız "Avropa üçün Patriotlar" siyasi qrupu Brüsseldə hakimiyyətə gəldiyi və üzv dövlətlərlə Brüssel bürokratiyası arasında pozulmuş tarazlığı bərpa etdiyi halda mümkün olacaq.
Siyasətçi bildirib ki, problemlər 2015-ci ildə Jan-Klod Yunkerin rəhbərliyi dövründə başlayıb. Onun sözlərinə görə, həmin vaxt Avropa Komissiyası hüquqi koordinasiya və müqavilələrin icrasına nəzarət edən qurumdan siyasi orqana çevrilib.(qaynarinfo)
