Sabiq polis rəisi dələduzluqda ittiham olunur
Binəqədi Rayon Məhkəməsində cəbhə hakimiyyəti dövründə polis rəisi işləmiş şəxsin məhkəməsi başlayıb.
“Ölkə.Az”ın məlumatına görə, cinayət məcəlləsinin 178.2.4-cü (dələduzluq; xeyli miqdarda ziyan vurmaqla törədildikdə) maddəsi ilə təqsirləndirilən Məhərrəmov Tahir Məhəmməd oğlunun məhkəmə prosesinə hakim Mirheydər Zeynalov sədrlik edir. T.Məhərrəmov barəsində istintaq dövründə polis nəzarəti altına vermə imkan tədbiri seçilib.
Qeyd edək ki, Məhərrəmov Tahir Məhəmməd oğlu 1993-cü ildə Ağsu rayon Polis Şöbəsinin rəisi vəzifəsində çalışıb. Əgər T.Məhərrəmovun cinayət əməli məhkəmə tərəfindən sübut olunsa, onu üç min manatdan beş min manatadək miqdarda cərimə və ya əmlakı müsadirə olunmaqla və ya olunmamaqla üç ildən yeddi ilədək müddətə azadlıqdan məhrum etmə ilə cəzası gözləyir.
