Gəncədə dayı bacıoğlunu bıçaqladı

Gəncə Ağır Cinayətlər Məhkəməsində bacısı oğlunu bıçaqlayan dayının məhkəməsi başlayır.

“Ölkə.Az”ın məlumatına görə, may ayının 22-də cinayət məcəlləsinin 126.1-ci (qəsdən sağlamlığa ağır xəsarət yetirmə) maddəsi ilə təqsirləndirilən İsmayılov Elnur Arzu oğlunun məhkəmə prosesinin hazırlıq iclası hakim Dadaş İmanovun sədrliyi ilə keçiriləcək.

İttiham aktına görə, hadisə dayı və onun yeniyetmə bacısı oğlu arasında qeydə alınıb. 2001-ci il təvəllüdlü Gəncə şəhər sakini İsmayılov Arzu Qalib oğlu 1989-cu il təvəllüdlü dayısı, İsmayılov Elnur Arzu oğlu ilə mübahisə edib. Mübahisə tərəflər arasında əlbəyaxa davaya çevrilib. Nəticədə onlar bıçağa əl atıblar. Bu zaman bacıoğlu Arzu bıçaqla dayısı Elnurun boğaz nahiyəsinə xəsarət yetirib. Elnur isə buna qarşılıq verərək Arzunun qarın nahiyəsinə bıçaq zərbəsi endirib. Yaralıların hər ikisi təcili xəstəxanaya çatdırılıb.

Elnurun vəziyyəti yüngül olduğundan ona ambulator yardım göstərilərək evə buraxılıb. Bacıoğlu Arzunun vəziyyəti orta-ağır olduğundan stasionar müalicəyə götürülüb.