Rəfiqəsindən qisas almaq üçün polisə yalan məlumat verdi
“Ölkə.Az”ın xəbərinə görə, cinayət məcəlləsinin 296.2-ci maddəsi ilə təqsirləndirilən Mikayılzadə Günəş Mehman qızı və Salmanov Zabit Umudvar oğlunun məhkəmə prosesinə hakim Elçin Mehdiyev sədrlik edir. Cinayət işində zərərçəkən qismində Camalzadə Ayşən Xaləddin qızı tanınıb.
DİN-in mətbuat xidmətinin verilən verilən məlumata görə, 2017-ci ilin noyabr ayında Şəki rayon sakini Məhəmməd Şirinov Şəki Şəhər Rayon Polis Şöbəsinə müraciət edərək naməlum şəxsin yaşadıqları evə basqın edərək bacısı Günəş Mikayılzadənin əllərini və ayaqlarını iplə bağlayaraq, onu öldürəcəyi barədə hədə-qorxu gəldiyini bildirib. Hadisə yerinə baxış keçirilərkən həqiqətən də Günəş Mikayılzadənin əllərinin və ayaqlarının bağlanıldığı aşkar edilib.
Araşdırmalar zamanı zərərçəkmiş şəxs baş vermiş hadisə ilə bağlı rəfiqəsindən şübhələndiyini bildirib. İstintaq-əməliyyat tədbirləri nəticəsində Günəş Mikayılzadənin ağır cinayət hadisəsi törədilməsini səhnələşdirərək, bilə-bilə yalan ifadə verdiyi müəyyən edilib. Aparılan araşdırmalarla Günəş Mikayılzadənin tanışı Zabit Salmanovla qabaqcadan əlbir olub cinayət əlaqəsinə girdiyi, rəfiqəsindən qisas almaq məqsədilə əvvəlcədən qurulan plan üzrə Z. Salmanovun onun əllərini və ayaqlarını bağlayaraq yaşayış evini tərk etdiyi müəyyən edilib.
Bundan başqa, istintaq zamanı məlum olub ki, Günəş Mikayılzadə oktyabrın 15-də 1000 manatının və geyim əşyalarının həmin qadın tərəfindən oğurlanması barədə Polis Şöbəsinə müraciət edib, lakin fakt öz təsdiqini tapmayıb.
Faktla bağlı Cinayət Məcəlləsinin 296.2-ci (Bilə-bilə yalan xəbərçilik etmə) maddəsi üzrə araşdırma aparılır.
