Politoloq: "Ermənistan özünü təklənmiş hiss edir"

102-ci rus bazasının hərbçisi tərəfindən Ermənistanın Gümrü şəhərində 6 nəfərdən ibarət ailə üzvlərinin güllələnməsi barədə xəbər vermişdik.

Hadisənin üzərindən bir neçə gün keçməsinə baxmayaraq hələ də Rusiya susqunluğa üstünlük verir.

Bəs, görəsən, Rusiyanın susqunluq nümayiş etməsi nədən xəbər verir?

Mövzu barədə Ölkə.az-a danışan politoloq Ərəstun Oruclunun fikrincə, Rusiya tərəfi məsələyə siyasi çalar verməməyə çalışır. Bununla yanaşı son hadisələrdən sonra Ermənistan özünü həm də təklənmiş hiss edir.

"Rusiya rus əsgərinin ermənistanda törətdiyi bu cinayətə ikili münasibət sərgiləyir. Rusiya bunu adi kriminal hadisə kimi təqdim etməyə, Ermənistan isə buna siyasi çalar verməyə çalışır.

Hazırda baş verənlər faktiki olaraq bu Rusiya əlehinə siyasi aksiyalara çevrilib və bu da təbiidir. Eyni zamanda Ermənistanda görünən detallardan biri də budur ki, aksiyanın təşkilatçıları sırasında müxalifət yoxdur. Maraqlıdır ki, müxalifət partiyaları bu məsələdə ümumiyyətlə görünmür.

Sual olunur ki, bu halda aksiyanı təşkil edənlər kimlərdir? Həqiqətənmi bu aksiyaların təşkilatçıları var? Mənə elə gəlir ki, aksiyaların arxasında ya Ermənistan hakimiyyətinin dayanmasını iddia etmək olar, ya da ki, ən azı Ermənistan hakimiyyətinin buna mane olmamasını demək olar. Rusiya tərəfi hələlik özünü sakit aparır və çalışır məsələyə siyasi çalar verilməkdən kənar dursun.

Rusiyanın zəiflədiyi bir dönəmdə və Azərbaycana daha çox meyl göstərdiyi bir vaxtda Ermənistan özünü həm də təklənmiş hiss edərək Qərbə əl açır. Görünür, bu da Rusiyanı qıcıqlandırır. Bu məsələdə də Rusiya özünü daha təmkinli aparır".

Qeyd edək ki, Gümrüdə erməni ailəsininin 6 üzvünü qətlə yetirən rus əsgəri Valeri Permyakovu müdafiə edən erməni vəkil bundan imtina edib. O, bu qərarı emosiyalara qapılaraq verdiyini bildirib.

Fatimə İbrahimova
Ölkə.az