Azərbaycan və Gürcüstan arasında son durum müzakirə edildi
Bu barədə “Ölkə.Az”a açıqlama verən millət vəkili Hikmət Babaoğlu deyib ki, görüşdə bir daha hər iki ölkənin parlamentariləri ölkələrimizin strateji əməkdaşlıq səviyyəsində qurulan əlaqələri bundan sonra da dostluq və mehriban qonşuluq səviyyəsində davam etdiriləcək.
“İki ölkə arasında strateji tərəfdaşlıq xarakteri daşıyan münasibətlərə zaman-zaman müəyyən problemlər yaratmaq cəhdləri olsa, bu mümkün olmayıb. Bunu hər iki ölkədə hamı dərk edir ki, bu strateji əməkdaşlıq, dostluq münasibətləri milli maraqlarımıza cavab verir və buna qarşı çıxmaq olmaz”,- deputat qeyd edib.
H.Babaoğlu onu da əlavə edib ki, görüşdə səsləndirilən fikrə əsasən, sərhədlərin delimitasiyası və demarkasiyası zamanı hansısa nüansların ortaya çıxaraq bu prosesə mənfi təsir göstərmə cəhdləri də iki ölkə arasındakı dostluq münasibətlərinə təsir edə bilməz:
“Xüsusən də son dövrlərdə Gürcüstanda yaşanan hadisələr fonunda Gürcüstan-Azərbaycan münasibətlərinin inkişaf etdirilməsi və münasibətlərə xələl gətirilmək istəyən qüvvələrə qarşı səylərini əsirgəməməlidir. Bu məsələlər danışıqlar yolu ilə həllini tapacaq”.
Milli Mclisdən “Ölkə.Az”a verlən xəbərdə isə bildirilib ki, Azərbaycan-Gürcüstan parlamentlərarası əlaqələr üzrə işçi qrupunun üzvləri Azərbaycan-Türkiyə-Gürcüstan parlamentlərinin xarici əlaqələr komitələrinin üçtərəfli birgə iclasında iştirak etmək üçün ölkəmizə səfərə gəlmiş Gürcüstan parlamentinin nümayəndə heyəti ilə görüşüblər. Nümayəndə heyətinə Gürcüstan parlamentinin Xarici əlaqələr komitəsinin sədri Sofio Katsarava başçılıq edir.
Görüşdə Azərbaycan-Gürcüstan parlamentlərarası əlaqələr üzrə işçi qrupunun rəhbəri Əflatun Amaşov münasibətlərimizin bütün sahələrdə yüksək səviyyədə qurulduğunu qeyd edərək, müstəqillik dövründə dostluq və əməkdaşlıq əlaqələrimizin uğurla davam və inkişaf etdiyini vurğulayıb.
Gürcüstan parlamentinin sədr müavini, Gürcüstan-Azərbaycan parlament dostluq qrupunun sədri Zviad Dzidziquri parlamentlərarası əlaqələrin daha intensiv xarakter daşıdığını bildirib. Ölkələrimiz arasında əməkdaşlığın durmadan genişləndiyini qeyd edib. Vurğulayıb ki, biz Azərbaycanla dostluğun qədrini-qiymətini yaxşı bilirik.
Nümayəndə heyətinin başçısı, Gürcüstan parlamentinin Xarici əlaqələr komitəsinin sədri Sofio Katsarava Azərbaycana bu ilk rəsmi səfərinin davamlı olacağına ümid ifadə edib. Həm beynəlxalq təşkilatlarda, həm də ikitərəfli əlaqələrdə deputatlarımızın çox səmərəli əməkdaşlıq etdiyini bildirib. Minnətdarlıqla qeyd edib ki, biz bütün məsələlərdə Azərbaycanın dəstəyini hiss edirik və qiymətləndiririk. Vurğulayıb ki, Gürcüstanla Azərbaycan bütün məsələləri dostluq və əməkdaşlıq şəraitində həll etməyə qadirdir.
Söhbət zamanı deputatlar Hikmət Babaoğlu, Rasim Musabəyov, Ramaz Nikolaişvili qarşılıqlı maraq doğuran məsələlər ətrafında fikirlərini bölüşüblər.
Mürtəza
Ölkə.Az
