\"Soçi görüşü Azərbaycanın maraqlarına cavab verir”
Bunu “Ölkə.Az”a açıqlamasında millət vəkili Fəzail Ağamalı avqustun 14-də Azərbaycan, Rusiya və İran liderlərinin Soçi görüşünü şərh edərkən deyib.
Onun sözlərinə görə, baxmayaraq ki, bu gün ABŞ-İran, ABŞ-Rusiya arasında gərginlik yaşanmaqdadır. “Lakin bu o demək deyil ki, Azərbaycan özünə qonşu olan dövlətlərlə münasibətlərinə fasilə verməlidir. Azərbaycan müstəqil dövlət olduğundan maraqlarına uyğun olaraq, müstəqil siyasət yürüdür. Bu siyasət ayrı-ayrı dövlətlərin bir-birlərinə olan münasibətinə heç bir aidiyyatı yoxdur.
Dövlətlərarası münasibətlərdə Azərbaycan maraqları əsas götürülür. O mənada düşünürəm ki, Azərbaycan, Rusiya və İran liderlərinin Soçi görüşündə bu maraqlar əsas götürülərək, müzakirələr aparılacaq. Həmin görüşdə əsasən regional əməkdaşlıq məsələlərinə ciddi önəm veriləcək. O baxımdan həmin görüş hər hansı dövlətə qarşı yönəlməyib”- F.Ağamalı qeyd edib.
Deputat əlavə edib ki, bu gün Azərbaycan Rusiya ilə İran arasında bir məkan olmaqla yanaşı, Qərblə Şərq arasında da körpü rolu oynayır və bu gün ölkəmiz üzərindən qərblə şərqi bir-birinə bağlayan bir sıra transmilli layihələr reallaşdırılıb. “Üç ölkənin liderlərinin görüşündə də cənubla şimali birləşdirən dəmiryolu layihəsi reallaşdırılmaqdadır ki, bu da tamamilə Azərbaycanın maraqlarına cavab verir. Ona görə də Azərbaycanın bu layihədə aktiv iştirakı önəmlidir və bu istiqamətdə lazımi addımlar atılacaqdır”- deputat bildirib.
Onun fikrincə, bu gün İranla ABŞ arasında münasibətlər nə qədər gərgin olsa da, nəticədə bu məsələ danışıqlar yolu ilə kompromislərə əsaslanaraq həllini tapacaq: “Bu gün Rusiya-ABŞ münasibətlərində də gərginlik hiss olunmaqdadır. Lakin bu gərginliyə baxmayaraq, əvvəlki illərlə müqayisədə münasibətlərdə bir yumşalma müşayiət olunur”.
Deputat hesab edir ki, Prezidenti İlham Əliyevin bu gün həyata keçirdiyi xarici siyasətin əsas qayəsi Azərbaycanı dünyada baş verən kataklizmlərdən qorumaqdır və onun uzaqgörən, müdrik siyasəti nəticəsində Azərbaycan həmin kataklizmlərdən yan keçib: “Əminəm ki, bundan sonra da belə olacaq”.
Azərbaycanın ikitərəfli və çoxtərəfli formatlarda dünya, region ölkələri ilə əməkdaşlıqlarının əhəmiyyətini şərh edən deputat bildirib ki, bütün bu əməkdaşlıq formatlarının əsas qayəsi Azərbaycanın inkişafına və ölkəmizin beynəlxalq aləmdəki rolunun, çəkisinin artmasına xidmət etməsinə nail olmaqdır.
“Bu gün Azərbaycan-Türkiyə-Gürcüstan, Azərbaycan-Türkiyə-Türkmənistan, Azərbaycan-Türkiyə-Pakistan, Azərbaycan-Türkiyə-Gürcüstan-İran və sair regional əməkdaşlıq formatları mövcuddur. Belə formatlarda əməkdaşlıq Azərbaycan üçün artıq bir ənənə halını alıb. Bu əməkdaşlıqlar təkcə Azərbaycan və region ölkələrinin maraqlarına deyil, həmçinin regionlararası əməkdaşlığa öz müsbət töhfəsini verir. Azərbaycan bu cür əməkdaşlıq formatlarında aktiv iştirak edir. Bir sıra hallarda Azərbaycanın təşəbbüsü ilə transmilli regional layihələr reallaşdırılır. Bütün bunlar isə Azərbaycanın beynəlxalq nüfuzunun artmasına xidmət edir. Azərbaycan regional transmilli layihələrdə aktiv iştirak etməklə geosiyasi, geoiqtisadi proseslərdə özünü ciddi oyunçu kimi təqdim etmiş olur. Soçi görüşü də bu qəbildən olan görüşlərin növbətisidir. Soçi görüşü Azərbaycanın maraqlarına cavab verir”.
Mürtəza
Ölkə.az